«Azııa jaýyngeri» halyqaralyq týrnırine 500-ge jýyq sportshy qatysyp jatyr
ASTANA. QazAqparat - Elordadaǵy «Dáýlet» sport kesheninde Nomad MMA stılinde VIII Halyqaralyq «Azııa jaýyngeri» týrnıri ótip jatyr, dep habarlaıdy QazAqparat tilshisi.
Azııanyń myqtysy ataǵy úshin 500-ge jýyq sportshy ózara baq synaýda. Olardyń ishinde Qazaqstan, Pákistan, Iran, Úndistan, Bangladesh, Ózbekstan, Ázerbaıjan, Qyrǵyzstan, Aýǵanstan jáne Reseı elderiniń ókilderi bar.
«MMA sport túri álemniń kóptegen elderinde erteden qolǵa alynyp, kósh ilgeri damyǵan. Osy turǵyda biz MMA-nyń ózindik ádisin oılap shyǵarý jolynda biraz eńbektendik. Birqatar elderge baryp, atalǵan sport túriniń deńgeıi men jetistikterin qarastyrdyq. Atqarylǵan biraz jumystyń arqasynda «Nomad MMA» kóshpeli halyqtardyń kúresin jasap shyǵardyq. Bizdiń bastapqy maqsatymyz - jas urpaqty MMA arqyly sportqa baýlý. Elimizde MMA boıynsha orta býyn ókilderinen kásibı sportshy joqtyń qasy. Osy olqylyqty joıý úshin biz jasóspirimderdi kóptep tartyp jatyrmyz. Jarysqa qatysyp, júldeli oryn almasa da, jetkinshek ózi úshin, ózin qorǵaý úshin aınalyssa, ol da biz úshin jetistik. Elimizde bul sport endi ǵana jandanyp, qoldaýǵa ıe bola bastady. Ózderińiz kórip otyrǵandaı, osymen 8-shi ret uıymdastyrylyp otyrǵan týrnırge 500-ge jýyq sportshy qatysýda», - dedi «Nomad MMA» respýblıkalyq federatsııasynyń prezıdenti Gadjı Gadjıev.
Federatsııa prezıdentiniń aıtýynsha, Nomad MMA jekpe-jegin damytýdaǵy taǵy bir maqsat - chempıondar jasap shyǵarý ǵana emes, atalǵan sporttyń buqaralyq sıpatqa ıe bolýy.
Eki kúnge sozylatyn sport básekesinde úzdik dep tanylǵandar halyqaralyq chempıontqa joldama alady.
Týrnırdi Nomad MMA halyqaralyq federatsııasy ótkizip jatyr. Qoldaýshylar -QR Mádenıet jáne cport mınıstrligi men Astana qalasynyń ákimdigi.
Aıta keteıik, búginde atalǵan jekpe-jek túrimen federatsııa aıasynda 14 myń bala aınalysyp júr. Sonymen qatar, 15 jyldyq tarıhy bar Nomad MMA halyqaralyq federatsııasynyń quramynda 15 memleket ókilderi bar. 
