«Azııa jańǵyryǵy-2014» tsırk festıvaliniń bas júldesin qazaqstandyq dýet ıelendi

ASTANA. QazAqparat - Elorda tsırkinde «Azııa jańǵyryǵy-2014» halyqaralyq tsırk festıvaliniń qorytyndysy shyǵaryldy. Baıqaýdyń bas júldesin Qazaqstannyń atynan qatysyp, «Ikar ańyzy» ónerimen kópshilik aldyna shyqqan Dáýlet Dosbatyrov pen Marına Starodýbova utyp aldy.

«Men osy ýaqytqa deıin kóptegen baıqaýlarǵa qatysyp, birneshe ret jeńimpaz atandym. Al Marına úshin bul alǵashqy jeńis, bul jeńis ony shabyttandyra túspek. Bul nómirdiń basqa eshqaıda qoıylmaı, osy shara úshin arnaıy daıyndalýynyń ózi bizdi jeńiske jetelese kerek. Tsırk óneri men dramatýrgııanyń ózara úndesýi kórermenge erekshe áser syılady. Men osy janrdy ómir boıy serik etip kelemin. Al Marına 5 jyldan beri aınalysyp keledi», - deıdi D.Dosbatyrov.

Ádilqazylardyń aıtýynsha, tańdaýly ónerpazdardyń arasynan úzdikterin tańdap alý qıynǵa túsken. Ár qatysýshynyń ózindik erekshelikteri bar.

«Biz shara jeńimpazyn anyqtaý úshin uzaq aqyldastyq. Óıtkeni biz qatysýshylardy rejıssýra, trıýkterdi oryndaý tehnıkasy men onyń qıyndyǵy, mýzykalyq árleý men ártistik sheberligi tárizdi 4 talap boıynsha baǵaladyq», - deıdi ádilqazy múshesi Taısııa Kornılova.

Esterińizge sala keteıik, Astana kúnin toılaý aıasynda 8 elden kelgen tsırk ártisteri «Azııa jańǵyryǵy» halyqaralyq festıvalinde óz ónerlerin ortaǵa saldy. Olardyń ónerlerin qala turǵyndary men qonaqtary 8 kún boıy tamashalady, dep habarlaıdy strategy2050.kz.