Azııa Ulttar kýbogy: Qazaqstan quramasy tórtinshi oryndy qanaǵat tutty

ASTANA. KAZINFORM – Vetnam astanasy Hanoı qalasynda voleıboldan áıelder quramalary arasynda ótip jatqan AVC Ulttar kýbogynda Qazaqstan qola júlde úshin alańǵa shyqty. 

Otandastarymyz Qytaılyq Taıbeımen sheberlik baıqasty.

Qazaqstan quramasy matchty sátti bastady – 25:22. Alaıda sol qarqynyn jalǵastyra almady – 13:25, 16:25, 13:25. Qorytyndy esep – 1:3.

Qazaqstan ótken jyly osyndaı jarysta kúmis júldege ıe bolsa, bıyl júldeden tys qaldy. Sóıtip jýyrda máskeýlik «Dınamo» komandasynyń bas bapkeri bolyp taǵaıyndalǵan Rıshat Gılıazýtdınov jattyqtyratyn qazaqstandyqtar kózdegen maqsat údesinen shyǵa almady. Toptyq básekede Iranmen oıynda Qazaqstan quramasynyń kapıtany Sana Anarqulovanyń jaraqat alyp qalýy jaǵdaıdy qıyndata tústi.

Jalpy, 2008 jyly Beıjiń Olımpıadasyna qatysyp, Azııa dodalarynda júldeli oryndardan kórinip júrgen Qazaqstan áıelder quramasynyń deńgeıi túskeni baıqalady. Buryn Qytaı, Japonııa, Koreıa, Taıland sııaqty Azııa úzdikterimen taıtalasa alatyn Qazaqstan Vetnam óz aldyna, bıyl Fılıppın, Qytaılyq Taıbeıge de ese jiberdi. 

Eske sala keteıik, budan buryn voleıboldan Ulttar kýbogynda Qazaqstan quramasy qola júlde úshin alańǵa shyǵatynyn jazǵan bolatynbyz.