Azııa-Tynyq muhıt aımaǵy álemdik ekonomıkalyq ósimniń eń joǵary qarqynymen erekshelenip otyr - BUU-nyń ekonomıkalyq máseleler jónindegi arnaıy qyzmetkeri
ALMATY. Mamyrdyń 6-sy. QazAqparat /Erlik Erjanuly/ - Azııa-Tynyq muhıty aımaǵy álemdik daǵdarystyń naǵyz qyzǵan kezeńinde de ekonomıkalyq ósimniń eń joǵary qarqynymen erekshelendi.
Bul búgin Almatyda "Azııa-Tynyq muhıt aımaǵyndaǵy ekonomıkalyq jáne áleýmettik jaǵdaıǵa sholý: 2010 jyl" dep atalatyn Azııa-Tynyq muhıty aımaǵyndaǵy ekonomıkalyq jáne áleýmettik keńes (ATMEÁK) jarııalanymynyń tanystyrylymynda aıtyldy, dep habarlaıdy QazAqparat.
BUU-nyń erekshe muqtajdyǵy jónindegi arnaıy bóliminiń ekonomıkalyq máseleler jónindegi qyzmetkeri Elvıra Myńbaevanyń aıtýynsha, búgin Bangkokte jarııalanǵan BUU baıandamasynda áleýmettik qajettilikterge arnalǵan shyǵyndardy arttyrý jóninde Azııa-Tynyq muhıt aımaǵyndaǵy memleketterdiń úkimetterine úndeý usynylǵan. Ol belsendi ekonomıkalyq jandanýdy qosymsha yntalandyryp, uzaq merzimdi bolashaqta ádildik jáne tepe-teńdik negizinde ekonomıkanyń qalypqa kelýine yqpal etýge baǵyttalyp otyr. ATMEÁK-niń jyl saıynǵy jarııalanymy, álemdik turǵyndardyń 62 paıyzyn quraıtyn Azııa-Tynyq muhıty aımaǵy memleketteriniń úkimetterine arnalǵan ashyq damýdy alǵa tartýdyń erekshe "jol kartasy".
"Azııa-Tynyq muhıty aımaǵyndaǵy ekonomıkalyq jáne áleýmettik keńeske 62 el múshe. Qazaqstan oǵan 1993 jyly kirdi. ATMEÁK jyl saıynǵy jarııalanymy sońǵy 62 jyldan beri jasalyp kele jatyr. Búgin onyń tanystyrylymy Azııa-Tynyq muhıt aımaǵynyń 20-dan astam qalasynda jáne Nıý-Iork, Vena, Jenevada ótip jatyr", deıdi Elvıra Myńbaeva.
