Azııa Paraoıyndary-2018: Kúmis júldeger oblys ákiminiń stıpendııasyn alatyn boldy
QARAǴANDY. QazAqparat - Qaraǵandylyq júzýshi Sergeı Kınah Jakartadaǵy (Indonezııa) Azııa paraoıyndarynda sátti óner kórsetken soń, oblys ákimi stıpendııasyn alýshylar tizimin tolyqtyrdy. Ol jaıly Dene shynyqtyrý jáne sport basqarmasy málim etti, dep habarlaıdy óńir basshysynyń resmı saıty.
«Bizde qol jetkizgen nátıjelerine oraı sportshylarǵa beriletin Qaraǵandy oblysy ákiminiń stıpendııasy bar. Qazir ony 4 múmkindigi shekteýli sportshy alady. Endi olardyń qataryna Sergeı Kınah ta qosyldy», - dedi basqarma basshysynyń orynbasary Rýstam Qojabekov baspasóz máslıhaty barysynda.
Stıpendııa aı saıyn tólenedi, onyń mólsheri 175 myń teńgeni quraıdy.
Júzýshi-sportshyǵa jáne onyń bapkeri Natalıa Manohınaǵa alǵys hattar tabys etildi.
Azııa birinshiligine tórt sport túri boıynsha 7 qaraǵandylyq qatysty: Natalıa Zvıagıntseva, Andreı Afanasev, Sergeı Kınah, Álııa Rahymbekova (júzý), Rýfat Habıbýllın (jeńil atletıka), Artem Vaıman (ústel tennısi) jáne Aıdos Jylqyshymov (oqpen atý).
Sergeı Kınah eki kúmis júldeni ıelendi: 100 metr qashyqtyqta brasspen júzý, 500 metrge erkin júzý boıynsha. Júz metrlik qashyqtyqty sportshy bir mınýt 23.06 sekýndta júzip ótti.
Bul -26 jasar sportshynyń mansabyndaǵy ekinshi Paraazıada. Birinshi ret ol qola júldege qol jetkizgen edi, osy joly nátıjesin jaqsartyp otyr. Aıta ketken jón, halyqaralyq sanattaǵy sport sheberi veb-saıttar qurýmen aınalysady. Úıinde Sergeı úshin barlyq týǵandary jankúıer boldy: jubaıy, eki balasy, ata-anasy, ájesi men atasy.
«Saıystarǵa daıyndyq eki kezeńnen quraldy: Ystyq kólde jáne Tarazda. Oǵan deıin jyl boıy úıde, olımpıada rezervin daıyndaý ortalyǵynda jáne N. Ábdirov atyndaǵy sport kesheninde shynyqtyq. Eń basty qıyndyq Qaraǵandyda 50 metrlik basseınniń bolmaýynda edi, sebebi barlyq halyqaralyq saıystardyń barlyǵy sondaı nysandarda ótedi», - deıdi jattyqtyrýshy Natalıa Manohına.
Qaraǵandyda Oblystyq mamandandyrylǵan múgedektik sport mektebi 2003-shi jyldan beri jumys istep keledi. Onda tirek-qozǵalys apparaty buzylǵan, zaǵıp, estý qabileti tómen, oılaý qabileti shekteýli sportshylar 9 sport túrinen: júzý, jeńil atletıka, ústel tennısi, fýtbol, shaǵyn-fýtbol, paýerlıftıng, otyryp oınaıtyn voleıbol, doıby- shahmat jáne toǵyzqumalaqtan jattyǵady. Tárbıelenýshilermen joǵary bilikti 15 jattyqtyrýshy jumys isteıdi.
