Azııa paralımpıada oıyndaryna qatysatyn Qazaqstan sportshylary 60-65 adamǵa jetýi múmkin
ASTANA. QazAqparat - Azııa paralımpıada oıyndaryna qatysatyn Qazaqstan sportshylary 60-65 adamǵa jetýi múmkin. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq paralımpıada komıtetiniń prezıdenti Darhan Kaletaev málim etti.
«Bizdiń jospar boıynsha kúzde ótetin Azııa paralımpıada oıyndaryna qatysatyn Qazaqstannyń paralımpıadalyq quramasy 60-65 adamǵa jetip qalady. Lıtsenzııa alýǵa áli de bolsa úsh aı ýaqytymyz bar. Qazirgi tańda 51 lıtsenzııany jeńip aldyq. Taǵy da 10-15 lıtsenzııa alýǵa úmittenip otyrmyz», - dedi D.Kaletaev.
Onyń sózine qaraǵanda, Azııa paralımpıada oıyndaryna qazaqstandyqtar jeńil atletıka men júzýden kóp lıtsenzııa jeńip alǵan.
Sonymen qatar D.Kaletaevtyń atap ótýinshe, aǵymdaǵy jyldyń kúzinde Koreıanyń Inchhon qalasynda ótetin Azııa paralımpıada oıyndarynda jeńiske jetken sportshylar 2016 jyly Brazılııada ótetin Paralımpıada oıyndaryna qatysýǵa múmkindik alady.
«Jalpy, búgingi tańda paralımpıadashylarymyzdyń daıyndyǵy óte joǵary», - dedi ol.
