Azııa Para oıyndaryna qatysýshylar sany artyp keledi
ASTANA. KAZINFORM- Qazaqstanda para sportty damytý jáne múgedektigi bar sportshylardy qoldaý baǵytynda júıeli jumystar júrgizilip keledi. Sport salasyndaǵy zańnamalyq ózgerister sportshylardy halyqaralyq jarystarda súıemeldeýge jáne súıemeldeýshilerdiń shyǵyndaryn qarjylandyrýǵa múmkindik berdi.
Bul týraly Týrızm jáne sport mınıstrligi Sport jáne dene shynyqtyrý isteri komıtetiniń basqarma basshysy Marat Qaskerbaev aıtty.
-Búginde Qazaqstan ulttyq quramasynyń sportshylary Japonııada ótip jatqan Azııa Para oıyndarynda el namysyn qorǵap jatyr. Tórt jylda bir ret uıymdastyrylatyn dodaǵa qatysatyn otandyq sportshylardyń sany artyp keledi. Atap aıtqanda, IV Azııa Para oıyndarynda elimizdiń atynan 131 sportshy óner kórsetse, bıylǵy básekede 150 sportshy baq synaýda. Bul kórsetkishter elimizde para sport túrleriniń qarqyndy damyp kele jatqanyn jáne sportshylarǵa jasalyp jatqan múmkindikterdiń keńeıe túskenin kórsetedi. Árıne, mundaı nátıjelerge qol jetkizýde memlekettiń júıeli qoldaýy erekshe ról atqarady, – dedi Marat Qaskerbaev.
Onyń aıtýynsha atalǵan baǵytta 2025 jyly mınıstrlik «Dene shynyqtyrý jáne sport týraly» zań jobasyn ázirledi. Qujatqa «múgedektigi bar sportshyny súıemeldeýshi» uǵymy engizildi. Jańa zańnamalyq normalar súıemeldeýshilerdiń halyqaralyq jarystarǵa qatysýyna baılanysty shyǵyndardy qarjylandyrýǵa múmkindik berdi. Sonyń nátıjesinde bıylǵy Azııa Para oıyndaryna ulttyq qurama sportshylarymen birge 37 súıemeldeýshi qatysyp jatyr. Olar sportshylardyń jarystarǵa daıyndalýyna, halyqaralyq dodalarǵa qatysýyna jáne qajetti qoldaý alýyna jan-jaqty kómek kórsetý ústinde.
Osyǵan deıin Qazaqstan quramasy Azııa Para oıyndarynda tarıhı jetistikke jetkeni týraly jazdyq.
