Azııa para oıyndary: Qazaqstan qorjynyna eki medal tústi
Qytaıdyń Hanchjoý qalasynda ótip jatqan Azııa para oıyndarynda Qazaqstan qorjynyna eki medal tústi, dep habarlaıdy Kazinform.
Shossedegi velojarystan jekeleı synda Kenjeǵul Seıtjan pılot Anton Lavrentevpen birge úzdik úshtikke ilikti.
Munda ońtústikkoreıalyq Kım Chjýn Bın jeńimpaz atansa, ındonezııalyq Nýrfendı máre syzyǵyn ekinshi bolyp qıdy.
Bul – VІІІ shaqyrylymdaǵy Májilis depýtaty K.Seıtjannyń osy Azıadadaǵy ekinshi medali.
Voleıboldan otyryp oınaýdan Qazaqstan erler quramasy fınalǵa deıin súrinbeı jetip, sońǵy básekede Iranǵa (14:25, 16:25, 18:25) 0:3 esebimen ese jiberdi. Sóıtip, qazaqstandyq paravoleıbolshylar kúmisti qanaǵat tutty.
Qazirgi kezde Qazaqstan qorjynynda 7 altyn, 12 kúmis, 21 qola júlde bar.
Eske sala keteıik, budan buryn Qazaqstan parasportshylary taǵy úsh medal jeńip alǵanyn jazǵan bolatynbyz.
Sondaı-aq jetinshi altyndy Dıas Kenjebek enshiledi.
