Azııa Para oıyndary: Qazaqstan 50 medal jeńip alyp, úzdik ondyqqa endi
ASTANA. KAZINFORM — 18-24 qazan aralyǵynda Japonııanyń Aıchı prefektýrasy men Nagoıa qalasynda ótken V Azııa Para oıyndarynda Qazaqstan ulttyq komandasy óz jarystaryn aıaqtady, dep habarlaıdy Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń baspasóz qyzmeti.
Qurlyqtyq dodada qazaqstandyq sportshylar 12 altyn, 16 kúmis jáne 22 qola medal jeńip alyp, jalpy sany 50 júldege qol jetkizdi. Jalpykomandalyq esepte Qazaqstan komandasy toǵyzynshy orynǵa turaqtady.
Azııa Para oıyndarynda Qazaqstan namysyn sporttyń 12 túrinen 150 sportshy qorǵady. Ulttyq qurama para dzıýdo, para velosport, para júzý, para paýerlıftıng, para jeńil atletıka, para sadaq atý, para oq atý, para ústel tennısi, para taekvondo, bochcha, arbadaǵy tennıs jáne voleıboldy otyryp oınaýdan synǵa tústi.
Ulttyq qurama eń kóp medaldi para dzıýdodan jeńip aldy.
Bul sport túrinen qazaqstandyq sportshylar 5 altyn, 1 kúmis jáne 7 qola medal ıelenip, jalpy sany 13 júldege qol jetkizdi.
Sonymen qatar Qazaqstan quramasy para dzıýdodan jalpykomandalyq esepte birinshi oryn aldy.
Atap aıtqanda, Ibrahım Nurmahanuly (J2, 70 kelige deıin), Beksultan Qulmyrza (J2, 81 kelige deıin), Jurqamyrza Shúkirbekov (J2, 95 keliden joǵary), Aqtolqyn Seıilbekova (J1, 70 keliden joǵary) jáne Zarına Raıfova (J2, 70 keliden joǵary) Azııa Para oıyndarynyń chempıony atandy.
Al Janbota Amanjol (J2, 95 kelige deıin) kúmis medal jeńip aldy. Ǵalymjan Smaǵululy, Ermek Nurqabaev, Baǵlanbek Onalbek, Erlan Ótepov, Alfııa Tilekqabyl, Daıana Fedosova jáne Aıala Mereke qola júldeger atandy.
Para júzýden Qazaqstan quramasy 1 altyn, 5 kúmis jáne 4 qola medal jeńip alyp, jalpy sany 10 júldege qol jetkizdi.
Bul sport túrinen Dıas Kenjebek S10 klasynda 100 metrge arqamen júzýden Azııa Para oıyndarynyń chempıony atandy. Sonymen qatar ol 100 metrge erkin júzý jáne 200 metrge keshendi júzý qashyqtyqtarynda kúmis, 100 metrge batterflıaı ádisimen júzýden qola medal jeńip aldy.
Álı Turǵanbekov SB4 klasynda 100 metrge brass ádisimen júzýden kúmis júldeger atandy. Sondaı-aq ol Qazaqstan quramasynyń sapynda 4×50 metrge aralas keshendi estafetaǵa qatysyp, taǵy bir kúmis medal ıelendi. Bul saıysta ulttyq qurama namysyn Álı Turǵanbekovpen birge Natalıa Zvıagıntseva, Zúlfııa Ǵabıdýllına, Aısultan Qulqaev jáne Sııazbek Dalıev qorǵady.
Qazaqstan quramasy 4×50 metrge erkin stıldegi aralas estafetada da kúmis júldege qol jetkizdi. Bul jarysta Natalıa Zvıagıntseva, Aısultan Qulqaev, Sııazbek Dalıev jáne Zúlfııa Ǵabıdýllına óner kórsetti.
Sonymen qatar Roman Potapov, Vıktor Volkov jáne Alına Sınelnıkova óz qashyqtyqtarynda qola medal jeńip alyp, ulttyq quramanyń júldeler sanyn tolyqtyrdy.
Para velosporttan ulttyq qurama 4 altyn, 4 kúmis jáne 1 qola medal jeńip aldy. Jalpy sany 9 júlde ıelengen qazaqstandyq velosportshylar qurlyqtyq dodada joǵary nátıje kórsetti.
Naıl Ermuhambet erler arasyndaǵy B klasynda tasjoldaǵy toptyq jarys pen jeke ýaqytqa jarysýdan eki altyn medal jeńip aldy.
Anastasııa Kalaýs ta áıelder arasyndaǵy osy eki baǵdarlamada chempıon atandy. Sonymen qatar ol trektegi 4000 metrge jeke qýalaý jarysynda kúmis júldege ıe boldy.
Kırıll Ilıýkevıch tasjoldaǵy toptyq jarys pen jeke ýaqytqa jarysýdan eki kúmis, trektegi 4000 metrge jeke qýdalaý jarysynda qola medal jeńip aldy. Al Juldyz Qaınarova tasjoldaǵy toptyq jarysta kúmis júldeger atandy.
Para paýerlıftıngten Qazaqstan quramasy 1 altyn, 2 kúmis jáne 3 qola medal jeńip alyp, jalpy sany 6 júldege qol jetkizdi.
Davıd Degtıarev 54 kelige deıingi salmaq dárejesinde 192 kelini kóterip, Azııa Para oıyndarynyń rekordyn jańartty jáne chempıon atandy.
Tursynaı Qabyl 41 kelige deıingi, Alına Solodýhına 45 kelige deıingi salmaq dárejesinde kúmis medal jeńip aldy.
Stanıslav Shakıev pen Aıjan Berimqulova jekeleı synda qola júldeger atandy. Sonymen qatar Erbolat Káribaı, Davıd Degtıarev jáne Stanıslav Shakıevten quralǵan Qazaqstan erler quramasy komandalyq jarysta qola medal ıelendi.
Para jeńil atletıkadan Qazaqstan quramasy 2 kúmis jáne 2 qola medal jeńip aldy. Islam Sálimov T13 klasynda uzyndyqqa sekirýden, Dastan Muqashbekov F36 klasynda ıadro ıterýden kúmis júldeger atandy. Ivan Zaleznıak F36 klasynda, Mahambet Serikqalıev F53 klasynda ıadro ıterýden qola medal ıelendi. Oǵan qosa, Aısulý Súleımenova áıelder arasynda 100 metrge júgirýden T62 klasynda 16,18 sekýnd nátıje kórsetip, Azııa rekordyn jańartty.
Para ústel tennısinen Qazaqstan sportshylary 4 qola medal jeńip aldy. Osylaısha ulttyq qurama atalǵan sport túrinen de júldegerler qatarynan kórindi.
Para sadaq atýdan Qazaqstan quramasy 1 kúmis jáne 1 qola medal ıelendi. Erler arasyndaǵy W1 klasynda juptyq synda Nurshat Tóleýqasym men Temirlan Seıtqamal kúmis júldeger atandy. Bul — Qazaqstannyń Azııa Para oıyndary tarıhyndaǵy para sadaq atýdan alǵashqy medali.
Sonymen qatar Nurshat Tóleýqasym W1 klasyndaǵy jekeleı jarysta qola medal jeńip aldy.
Para oq atýdan Erkin Ǵabbasov R1 baǵdarlamasynda, SH1 klasynda 10 metr qashyqtyqtan pnevmatıkalyq vıntovkamen atý saıysynda altyn medal jeńip alyp, Azııa Para oıyndarynyń chempıony atandy.
Voleıboldy otyryp oınaýdan Qazaqstan erler quramasy Azııa Para oıyndarynyń kúmis júldegeri atandy. Qazaqstandyq voleıbolshylar jartylaı fınalda Irak quramasyn tartysty kezdesýde 3:2 esebimen jeńip, fınalǵa joldama aldy. Al altyn medal úshin ótken sheshýshi kezdesýde Iran quramasyna 0:3 esebimen ese jiberip, qurlyqtyq dodany ekinshi orynmen aıaqtady.
Al para taekvondo, bochcha jáne arbadaǵy tennısten synǵa túsken Qazaqstan sportshylary júldeli oryndarǵa ıe bola almady.
— Bıylǵy Azııa Para oıyndary Qazaqstan ulttyq quramasy úshin nátıjeli boldy. 2023 jyly Qytaıdyń Hanchjoý qalasynda ótken IV Azııa Para oıyndarynda sportshylarymyz 8 altyn, 12 kúmis jáne 21 qola medal jeńip alyp, jalpykomandalyq esepte 11-oryn ıelengen bolatyn. Al bıyl ulttyq qurama 12 altyn, 16 kúmis jáne 22 qola medalǵa qol jetkizdi. Osylaısha, ótken oıyndarmen salystyrǵanda altyn medal sanyn tórtke, jalpy júlde sanyn toǵyzǵa arttyrdyq. Sonymen qatar bıyl Qazaqstan quramasy Azııa Para oıyndarynyń tarıhynda alǵash ret para ústel tennısi men para sadaq atýdan medal jeńip aldy. Sportshylarymyz birneshe rekord ornatyp, joǵary nátıjeler kórsetti. Atap aıtqanda, Erkin Ǵabbasov pen Davıd Degtıarev Azııa Para oıyndarynyń rekordtaryn jańartsa, Dıas Kenjebek pen Aısulý Súleımenova óz klastarynda Azııa rekordtaryn ornatty. Bul jetistikter — eń aldymen, memleket tarapynan para sportty damytýǵa kórsetilip otyrǵan qoldaýdyń, sportshylarymyzdyń tabandylyǵy men qajyrly eńbeginiń, jattyqtyrýshylardyń kásibı jumysy men júıeli daıyndyqtyń nátıjesi, — dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń dırektory Bolatbek Dýketaev.
Osylaısha, V Azııa Para oıyndarynyń qorytyndysy boıynsha Qazaqstan ulttyq quramasy 12 altyn, 16 kúmis jáne 22 qola medal jeńip alyp, jalpy sany 50 júldemen jalpykomandalyq esepte toǵyzynshy orynǵa turaqtady.
Osyǵan deıin Maksım Bogatyrev Argentınada parakanoeden álem chempıony atanǵanyn jazdyq.
