Azııa oıyndarynyń ashylý saltanaty Vankýverde bolǵan kórinisterden kem bolmaıtyn úlken shoýǵa aınalady - uıymdastyrý komıteti
áýirdiń 22-si. QazAqparat /Aıdar Ospanalıev/ - «Astanada ótetin VII qysqy Azııa oıyndarynyń ashylý jáne jabylý saltanaty olımpıadanyń eń áserli kórinisterine aınalýy tıis.
Olar «Astana-arena» fýtbol alańynda ótedi. Búgin tań ata biz Azııa oıyndarynyń ashylý saltanatyn ótkizýge qatysty kelisimshartqa qol qoıdyq», dedi búgin «VII qysqy Azııa oıyndary men olımpıada alaýy estafetasyn uıymdastyrý jónindegi qalalyq dırektsııa» memlekettik kommýnaldyq qazynalyq kásipornynyń dırektory Naıl Nýrov. Bul týraly ol búgin «VII qysqy Azııa oıyndary: daıyndyq deńgeıi jáne birlesken qımyldardyń basym baǵyttary» atty dóńgelek ústel otyrysynda málim etti, dep habarlaıdy QazAqparat.
Onyń sózine qaraǵanda, Azııa oıyndarynyń ashylý saltanatyna qatysty sharalarmen úlken halyqaralyq kompanııalar jumys isteıdi. Onyń quramynda qazaqstandyq rejısserler men stsenarıster, kompozıtorlar bar. Sondaı-aq bul baǵyttaǵy jumystarǵa Reseı, Eýropa elderi men Avstralııanyń jáne AQSh-tyń jetekshi mamandary da atsalysady. «Bul shara Vankýverde bolǵan kórinisterden kem bolmaıtyn úlken shoýǵa aınalady. Óıtkeni ony uıymdastyrý úshin elimizge kóptegen qazirgi zamanǵy tehnıkaly qural-jabdyqtar ákelinedi. Aldaǵy eki aıdyń ishinde-aq osy jumystardy bastaımyz. Bizdiń áriptesterimiz qazir daıyndyq jumystaryn respýblıkalyq jáne qalalyq keden komıtetteriniń ókilderimen de júrgizýde. Sebebi qysqy Azııa oıyndaryn ótkizýge qatysty Qazaqstan úkimeti men Azııanyń olımpıada keńesimen jasalǵan kelisim qysqy oıyndar úshin qajetti qurylǵylardy shekaradan alyp ótkizý kezindegi alymdar men salyqtardan bosatady», dedi N.Nýrov.
Onyń sózine qaraǵanda, qysqy oıyndarǵa keletin qonaqtardyń barlyǵyn birinshi kezekte shekarashylar men keden salasynyń mamandary kútip alady. «Qonaqtardyń elimizdiń aımaǵyna enisimen Qazaqstan týraly jaǵymdy kózqaras qalyptastyrýlary úshin olardy múmkindiginshe zor iltıpatpen qarsy alǵan jón», dedi kásiporyn dırektory.
