Azııa oıyndaryndaǵy jetistigimizdi saqtap qalýǵa kúsh salýymyz qajet-depýtat I. Elekeev
ANA. 15 aqpan. QazAqparat - Qazaqstan bıylǵy jyldy tabysty bastady. Álemdik qarjy daǵdarysynan ekonomıkalyq damýǵa bet alǵan memleketimiz mádenı jáne sporttyq sharalarda tamasha jetistikterge qol jetkizdi.
Qazaqstan 7-qysqy Azııa oıyndaryn joǵary deńgeıde uıymdastyrýmen qatar, Azıada tarıhynda utyp alǵan júldelerdiń sany jaǵynan rekord ornatty. Memleket basshysy Nursultan Nazarbaev Azıadanyń jabylý saltanatynda sportshylarymyzdyń el táýelsizdiginiń 20 jyldyǵyna tamasha tartý jasaǵanyn aıryqsha atap ótti. QR Parlamenti Májilisiniń depýtaty, «Nur Otan» partııasynyń múshesi Irak Elekeev osy 7-qysqy Azııa oıyndaryndaǵy el jetistigi týraly oılaryn ortaǵa saldy.
Onyń pikirinshe, Qazaqstan ótken jyldy zor tabyspen aıaqtaǵany belgili. Elimiz Eýropadaǵy qaýipsizdik jáne yntymaqtastyq uıymyna (EQYU) tóraǵalyq etý mıssııasyn joǵary deńgeıde atqardy. 56 eldiń basshylaryn jınap, osy halyqaralyq bedeldi uıymnyń Sammıtin Astana tórinde ótkizdi.
- Endi 2011 jyldy da Qazaqstan zor mártebemen bastap otyr. Astana men Almaty qalalarynda 7-qysqy Azııa oıyndaryn ótkizip, halyqaralyq deńgeıdegi osy bir sporttyq is-sharany asa joǵary uıymdastyrýshylyqpen atqara bildi. Men de sportshylarymyzǵa jankúıer bolyp, jeńiske jetýine tilektes boldym.
Osy aıtýly dodanyń ótkizilýiniń ózi ǵalamat oqıǵa. 2007 jyly 6- Azıada Qytaıda ótkeni belgili. Sonda 7-oıyndardy ótkizý mindeti Qazaqstanǵa tapsyrylǵan bolatyn. Álemdik qarjy daǵdarysy árbir eldi tolǵandyryp otyrǵan tusta qysqy Azııa oıyndarynyń ótip-ótpeýi úlken máselege aınaldy. Sol kezde Qazaqstan Prezıdenti Nursultan Nazarbaev qandaı qıyndyq bolsa da, Azııanyń Olımpıadasy sanalǵan bul jarysty Qazaqstannyń qalaıda ótkizetinin málimdedi jáne Úkimetke, Astana men Almaty qalalarynyń ákimderine shuǵyl tapsyrma berdi. Elbasynyń tikeleı baqylaýǵa alýynyń arqasynda, búkil el bolyp qoldaýdyń nátıjesinde jańa sport keshenderi salyndy, burynǵy sporttyq bazalar kúrdeli jóndeýden ótkizilip, jarysqa 100 paıyz daıyn boldy.
Sonymen qatar sportshylarymyz da osy básekege daıyn ekendikterin dáleldep shyqty. Azııanyń 27 eli qatysqan jarysta Qazaqstan sportshylary 32 altyn, 21 kúmis jáne 17 qola medalǵa ıe boldy. Barlyǵyn qosqanda 70 medal alyp, beıresmı jalpy komandalyq esepte birinshi orynǵa shyqty.
Mine, elimizde Azııa oıyndary joǵary deńgeıde ótti. 70 ret kók baıraǵymyz bıik tuǵyrǵa kóterilip, 32 ret memlekettik Ánuranymyz shyrqaldy. Elimizdiń árbir azamaty uıymshyldyq tanytyp, Qazaqstannyń patrıoty bola bildi. Ósip kele jatqan urpaq jarystardan úlken áser aldy, ózderi de sportpen aınalysý eldiń mereıin kóteretin mártebeli mindet ekenin uǵyndy.
Jańa on jyldyqqa qadam basqan tusymyzda osyndaı ıgi sharany ótkizgeni Qazaqstannyń halyqaralyq bedelin asyra tústi. Men muny Prezıdent saıasatynyń saltanaty der edim! Bul elimizdegi - birlik pen tatýlyqtyń, turaqtylyq pen kelisimniń jeńisi! Azııa oıyndaryndaǵy jetistigimizdi aldaǵy ýaqytta da saqtap qalýǵa kúsh salýymyz qajet.
Elbasymyz bıylǵy Joldaýynda osy joly salynǵan sport keshenderinde jas jetkinshekterdiń dene tárbıesimen aınalysýy tıis ekenin aıtqan bolatyn. Aldaǵy ýaqytta Úkimet pen ákimder tarapynan bolashaq sportshylarymyzdyń jetilýine basa kóńil bólinse eken deımin. Elimizdiń ózge qalalarynda da tabıǵı erekshelikterdi eskere otyryp, sport keshenderin salý isi jan-jaqty qolǵa alynýy kerek dep oılaımyn, - dedi I. Elekeev.
