Azııa oıyndarynda bokstan el namysyn kimder qorǵaıdy

ASTANA. QazAqparat – Qytaıdyń Hanchjoý qalasynda 23 qyrkúıek pen 8 qazan aralyǵynda ótetin Azııa oıyndarynda bokstan erler arasynda el namysyn qorǵaıtyn boksshylarymyzdyń esimi belgili boldy, dep habarlaıdy QazAqparat tilshisi.

Bas bapker Myrzaǵalı Aıtjanov Qytaı elinde ótetin Saryqurlyq dodasyna kil myqty shákirtterin alyp barmaq.

QR Boks federatsııasy taratqan málimetke súıensek, Azııa oıyndaryna boksshylardy irikteý Tashkentte ótken álem chempıonaty men Astana-2023 halyqaralyq Elorda Cup týrnıriniń qorytyndysy boıynsha saralanǵan.

Atap aıtsaq, Hanchjoý qalasynda 51keli salmaqta Sáken Bıbosynov, 57 keli salmaqta Mahmud Sabyrhan el namysyn qorǵamaq.

Al 63,5 kelide Ertýǵan Zeınýllınov, 71 keli salmaqta komanda kapıtany Aslanbek Shymbergenov sharshy alańǵa shyqpaq.

80 keli salmaqta Nurbek Oralbaı synǵa tússe, 92 keli de Saǵyndyq Toǵambaıǵa úmit artamyz.

Al asa aýyr salmaqta Qamshybek Qońqabaev rıngke shyǵady.

Aıta keteıik, Azııa oıyndarynda Qazaqstannyń týyn boksshy Aslanbek Shymbergenov pen jeńil atlet Nadejda Dýbovıtskaıa kóterip shyǵady.

Azııa oıyndary 23 qyrkúıek pen 8 qazan aralyǵynda ótedi. 40 sport túrinen medaldar jıyntyǵy sarapqa salynady.

Osyǵan deıin bokstan áıelder arasynda Azııa oıyndaryna el namysyn kimder qorǵaıtynyn jazǵan bolatynbyz.