Azııa oıyndarynda Batys Qazaqstannan qos birdeı eskekshi el namysyn qorǵaıdy
ORAL. QazAqparat - Indonezııada ótetin jazǵy Azııa oıyndarynda Batys Qazaqstannan qos birdeı eskekshi el namysyn qorǵaıdy, dep habarlaıdy QazAqparat tilshisi.
Baıdarkadan Qazaqstan ulttyq quramasynyń aǵa bapkeri, elimizdiń eńbek sińirgen jattyqtyrýshysy Aleksandr Akýnıshnıkovtiń aıtýynsha, tórt jylda bir ret ótetin aıtýly dodada Alekseı Dergýnov pen Andreı Ergýchev baq synamaqshy.
Eskekshilerdiń ekeýi de tájirıbeli, A.Dergýnov buǵan deıin úsh olımpıadaǵa qatyssa, A.Ergýchev budan eki jyl buryn Rıodaǵy dodada aıdynǵa shyqqan bolatyn. Eń bastysy, budan tórt jyl buryn ońtústikkoreıalyq Inchhon qalasynda ótken Azııa oıyndarynda qos eskekshi de top jaryp, chempıon atanǵan edi, ıaǵnı olar jeńistiń dámin biledi.
Qazirgi kezde Alekseı men Andreı Qazaqstan ulttyq quramasy sapynda Azııa oıyndaryna daıyndalýda. Olar 1 myń metrlik qashyqtyqta eki kisilik jáne 500 metrden tórt adamdyq baıdarkada synǵa túspekshi.
«Kúni búgin Brest qalasyndamyz. Ázirlik qalypty ótýde. 30 shilde kúni Bolgarııa astanasy Sofııaǵa attanamyz. Onda Azııa oıyndary aldyndaǵy qorytyndy jıyn bolmaqshy. Qazaqstandyq eskekshiler aldaǵy jaýapty synda joǵary oryndardan kóriný úshin baryn salatyn bolady», dedi QazAqparat tilshisine Aleksandr Akýnıshnıkov.
Aıta keteıik, Oral qalasynda týyp-ósip, sporttyq jolyn bastaǵan A.Akýnıshnıkovtiń ózi 1986 jyly KSRO quramasy sapynda álem chempıony atanǵan bolatyn. Búginde óz izbasarlaryn daıyndap júrgen ol aldaǵy jyly alpys jastyń bıigine shyǵady.
