Azııa oıyndaryna 100 kún qalýyna oraı Almatyda kórme ashyldy
ALMATY. Qazannyń 22-si. QazAqparat /Názıra Eleýhan/- Búgin Almatyda «2011 jylǵy 7-nshi qysqy Azııa oıyndaryna» 100 kún qalýyna oraı, QR Memlekettik murajaıynda «Qazaqstan sportynyń tarıhy» atty kórme ashyldy. Onyń ashylýyna Almaty qalasynyń ákimi Ahmetjan Esimov qatysty.
Kórmege qoıylǵan eksponattar arqyly almatylyqtar men qala qonaqtary qazaq sportynyń túrlerimen tanysyp, KSRO men táýelsiz Qazaqstannyń ataqty sportshylarynyń esimderin esterine túsire alady. Murajaı qorynan el maqtanyshy Abaı Qunanbaevtyń toǵyz qumalaq oıyny, belgili boksshy Serik Qonaqbaevtyń bylǵary qolǵaptary men kýboktary, Dáýlet Turlyhanovtyń medaldary jáne basqa da eksponattar qoıylǵan. Kórme zalynda «2011 jylǵy 7-shi qysqy Azııa oıyndaryna», qysqy sport túrlerine erekshe oryn berilgen.
Atalmysh kórme 2011 jyldyń 25 qańtaryna deıin jalǵasatyn bolady.
Kórmeniń ashylý barysynda Azııa oıyndaryna qatysýshylarǵa sporttyq kıim tigýimen aınalysatyn ZIBRO (Fashion) kompanııasynyń kıim úlgileri kórsetildi. Kıimderdi el sportynyń ardagerleri - Olga Shıshıgına, Andreı Verveıkın, Islam Baıramýkov kıip shyqty.
Jaqynda ZIBRO dızaınerlik ujymy Reseı elinde bul kıim úlgilerin kórsetip keldi. Oǵan ataqty reseılik modeler Vıacheslav Zaıtsev qatysty. Reseılikter tikilgen kıimniń sapasy men sándik úlgige joǵary baǵa berip, «álemdik deńgeıdegi kollektsııa» dep atap ótken bolatyn.
Shara barysynda Ahmetjan Esimov Almatyda Azıada oıyndaryna daıyndyq belgilengen ýaqytqa saı júrip jatqandyǵyn ári sporttyq nysandardyń barlyǵy der kezinde daıyn bolatyndyǵyn atap ótti. «Qazirdiń ózinde Balýan Sholaq atyndaǵy sport saraıy, «Medeý» muz aıdyny daıyn, bularda qazaqstandyq sportshylar daıyndyq ótkizýde. Shańǵy tramplınderiniń halyqaralyq kesheni de daıyn, munda taıaýda Azııa jáne Evropa sportshylarynyń qatysýymen Kontınentaldy Kýbok ótkizildi. «Shymbulaqtaǵy» jumystar da belgilengen kestege saı júrýde. Munda qarasha aıynyń basynda uzyndyǵy 4,6 km bolatyn gondoldy jol salynbaq, bul álemdegi osyndaı ekinshi jol bolmaq»,- dedi qala basshysy.
Onyń aıtýynsha, «Bul megapolıs úshin óte paıdaly joba, bolashaqta ol Almatyda týrızm men sporttyń, ekologııalyq jaǵdaıdyń burynǵydan da jaqsara túsýine yqpal etetin bolady jáne Azıadanyń Qazaqstan úshin tek sporttyq qana emes, saıası da máni bar. Almaty - qarjy, ekonomıka, ǵylym, bilim, mádenıet ortalyǵy, endi qalamyzǵa kelgen sheteldik sportshylar men týrıster bizdi burynǵydan da tereńirek tanyp, úlken megapolıstiń tarıhymen, kórnekti oryndarymen jaqyn tanysatyn bolady. Al, biz el mártebesiniń burynǵydan da arta túsýine kúsh jumsaıtyn bolamyz», - dedi qala ákimi Ahmetjan Esimov.
