Azııa oıyndary joǵary deńgeıde uıymdastyryldy - Nepal olımpıada komıtetiniń Bas hatshysy Djevan Ram Shreza
ALMATY. 7 aqpan. QazAqparat /Názıra Eleýhan/- 7-Qysqy Azııa oıyndary joǵary deńgeıde uıymdastyryldy. Maǵan Shymbulaq óte unady, óte ásem, tabıǵaty keremet jer eken. Ondaǵy sporttyq oryndardyń barlyǵyna joǵary baǵa beremiz.
Bul týraly Nepal olımpıada komıtetiniń bas hatshysy Djevan Ram Shreza QazAqparat tilshisine bergen suhbatynda aıtty.
Onyń aıtýynsha, Azııa oıyndarynyń eki qalada ótkizilýi ol tájirıbelikti jáne de iskerlikti talap etedi. "Úlken sporttyq sharany ótkizý ońaı sharýa emes, bul naǵyz isker basshylardyń arqasynda, eldi basqaryp otyrǵan Prezıdenttiń arqasynda joǵary deńgeıde ótip jatyr dep bilemiz. Biz Azıadanyń ashylýynda boldyq. Keremet ótti, bir sózben aıtqanda tánti boldyq. Bizdiń kózqarasymyz boıynsha sharanyń óte jaqsy ótýi tek damyǵan elderde, mereıi ústem memleketterde ǵana bolady. Mundaı sporttyq dodany ótkizip otyrǵan el - Qazaqstan abyroıly memleket", - dep atap ótti Djevan Ram.
Ol sonymen qatar: "Qazaqstanǵa kelgeli biz Astana qalasynda da, Almatyda da boldyq, osy ýaqyttyń ishinde biz qazaqtardyń qonaqjaılylyǵyna tánti boldyq. Biz ystyq jerdiń adamdarymyz, Qazaqstanǵa kelgende kún sýyq boldy, qazaq ultynyń qonaqjaılylyǵy, ystyq qabyldaýy bizdi sol sýyqtan qorǵady. Sol úshin rahmet sizderge! Adamdary tárbıeli, mádenıetti eken. Munda kóptegen dostar taptyq", - dedi.
Ol sondaı-aq: "Men Almatyǵa ekinshi ret kelip otyrmyn. Almatynyń Astanaǵa qaraǵanda tabıǵaty tamasha eken. Biraq, Astana álem qoıyp jatqan standarttarǵa sáıkestigimen tántti etti, ǵımarattary ásem de, kórikti eken", - dep atap ótip, óz tilegin bildirdi. "Qazaq sportshylaryna aldaǵy ýaqytta da bıikterden kórine berýlerine tilektespin! Elderińizge, barsha qazaqstandyqtarǵa baqyt tileımin!", - dedi Djevan Ram Shreza myrza.
