Azııa oıyndary: Qazaqstandyq sportshylardyń alǵashqy legi Djakartaǵa jetti
ASTANA. QazAqparat - Azııa oıyndaryna attanǵan Qazaqstan quramasynyń sportshylary Djakarta men Palembangtaǵy atletıkalyq aýyldarǵa keldi, dep habarlaıdy QazAqparat QR UOK-niń baspasóz qyzmetine silteme jasap.
Esterińizge sala keteıik, Qazaqstan quramasy sportshylarynyń basym bóligi 12 tamyz kúni Almatydan Djakartaǵa attanǵan bolatyn. Sportshylardy jýrnalıster men jankúıerler jáne basshylyq quram sát-sapar tilep, AІVA akademııasynan saltanatty túrde shyǵaryp salǵan bolatyn.
Jazǵy Azııa oıyndary 18 tamyz kúni bastalady. Atalǵan oıyndarǵa Qazaqstan ulttyq quramasy atynan 440 sportshy qatysady, onyń ishindegi 404 sportshy 25 olımpıadalyq sport túrinen baq synaıdy.
Djakartadaǵy (Indonezııa) Azııa oıyndarynda jalpy esebi 462 medaldar jıyntyǵy sarapqa salynady, onyń ishinde 363 júlde olımpıadalyq sport túrlerinen óz ıesin tappaq. Taǵy bir aıta keterligi, bıyl Azııa oıyndarynyń baǵdarlamasynan nysana kózdeý jáne stend atýdan komandalyq jarys pen bokstan erler arasynda aýyr salmaq dárejeleri (81 keli, 91 keli, +91 keli) alynyp tastaldy.
Qurlyq dodasy Djakarta jáne Palembang qalalarynda ótedi. Atletıkalyq aýyldar eki qalada da ornalasqan.
Djakartada sporttyń myna túrlerinen jarys ótedi: jeńil atletıka, boks, dzıýdo, kúres túrleri, velosport (trek, shosse, maýtınbaık), sý doby, qazirgi bessaıys, taekvondo, semserlesý, karate, regbı, sýda júzý, gandbol, sınhrondy júzý, sadaq atý, kórkem gımnastıka, jelkendi sport, kógaldaǵy hokkeı, eskek esý (slalom), sporttyq gımnastıka, voleıbol, golf, basketbol, basketbol 3h3, batýtta sekirý.
Palembangta sporttyń myna túrlerinen jeńimpazdar anyqtalady: akademııalyq esý, baıdarka men kanoede esý, nysana kózdeý, stend atý, trıatlon, jaǵajaı voleıboly, sporttyq quzǵa órmeleý, tennıs.
