Azııa oıyndary - 2018: Qazaqstan tuńǵysh ret golf oıynynan jarysqa qatysady

ASTANA. QazAqparat - Qazaqstan Azııa oıyndarynda tuńǵysh ret golf oıynynan jarysqa qatysady. Bul týraly QR Mádenıet jáne sport mınıstri Arystanbek Muhamedıuly Feısbýktegi paraqshasynda jazdy, dep habarlaıdy QazAqparat tilshisi.

«Qazaqstan tuńǵysh ret golf boıynsha jarysqa qatysady. Bizdiń eldegi golftiń damýyna bul oqıǵanyń mańyzy zor. Golfshilermen jolyqtym - qulshynystary joǵary! Týrnırde er adamdar arasynda el namysyn Dáýlet Túleýbaev, Ádilet Qojabergen, Ádil Muhamedjanov jáne Sherhan Súgir, al áıelder arasynda - Albına Agaeva jáne Rıvekka Jumaǵulova qorǵaıdy», - dep atap ótti mınıstr.

Osy rette Arystanbek Muhamedıuly elimizdiń namysyn qorǵaıtyn eki oıynshymyz týraly tolyǵyraq jazǵan.

«Golfshi Rıvekka Jumaǵulova jalpy bilim berý mektebiniń toǵyzynshy synybyn úzdik aıaqtap, jaz boıy Slovakııa, Chehııa, Polsha, Malaızııa elderinde jarysta boldy. Qazaqstannyń qurama komandasy qatarynda Rıvekka Azıada barysynda Azııanyń myqty golfshilerine qarsy turady. Ol joǵary oryndarǵa kúresýge daıyn. Golf súıer qaýymǵa aty belgili Dáýlet Túleýbaevqa da erekshe úmit artamyz. Dáýlet Stenfordta oqýyna baılanysty áýesqoılyq sporttan aýyspaı júr. Bul biregeı oıynshynyń bolashaǵynan úmitimiz zor. Túleýbaev Tokıoda ótetin Olımpıada-2020 qatysyp, Qazaqstandy álem arenasynda tanymal etýdi ózine maqsat etip otyr. Golf týrnıri Azııanyń eń áıgili Pondok Indah Golf Course klýbynyń alańynda ótedi. Bizdiń oıynshylarǵa sáttilik tileıik!», - dedi Arystanbek Muhamedıuly.