Azııa oıyndarynda tarıhı altyn jeńgen Temirlan Tileýles elge oraldy
ALMATY. KAZINFORM — Japonııada ótken HH jazǵy Azııa oıyndarynda qatysqan sportshylardyń taǵy biri legi Almatyǵa ushyp keldi.
Elge oralǵan sportshylardyń qatarynda taekvondodan qola júldeger Batyrhan Tóleýǵalı, vırtýaldy taekvondodan qola júldeger Rıta Bakısheva, erkin kúresten qola júldeger Nurqoja Qaıpanov, sondaı-aq kúmis medal ıelengen Qazaqstannyń sý doby quramasy elge oralady.
Sondaı-aq tarıhı jetistiktiń ıesi Temirlan Tileýles te Almatyǵa keldi. Ol taekvondodan erler arasynda 58 kg deıingi salmaq dárejesinde qazaqtan shyqqan tuńǵysh Azıada jeńimpazy atandy.
Oǵan deıin Azııa dodasynda otandyq sportshylar birneshe márte kúmis ıelengen bolatyn. Olar: Ferýza Ergeshova (Gýanchjoý-2010, 73 kg), Nursultan Mamaev (Inchhon-2014, -58 kg) jáne Jansel Denız (Djakarta-2018, 73 kg).
Almaty áýejaıynda sportshylardy týǵan-týystary men dostary, ákimdik pen federatsııalar ókilderi saltanatty túrde qarsy aldy. Al Temirlan Tileýles BAQ ókilderimen tildesip, jarystan keıingi óz áserimen bólisti.
— Áýejaıda jyly qarsy alyp, jarys kezinde qoldaý kórsetken qazaq eline alǵys aıtamyn. Jarys jaqsy ótti. Biraq meniń qarsylastarym óte qıyn boldy. Iran jáne Koreıa elderiniń ókilderimen ekinshi jáne úshinshi kezdesýde jekpe-jek ótkizdim. Al fınalda fılıpındik sportshyny jeńip, tarıhqa engenime qýanyshtymyn, — dedi ol.
Sportshy óziniń tarıhı nátıjesi týraly ne oılaıtynyn da aıtyp ótti.
— Men úshin bul jeńistiń mańyzy joǵary. Birinshi kezekte qazaqstandyq taekvondoshylar álemdik arenada uta alatynyn dáleldedik. Osymen toqtamaımyz, alda álem chempıonaty jáne Olımpıada oıyndary bar. Solardy utýǵa tyrysamyz, — dedi ol.
Eske salaıyq, Japonııada XX jazǵy Azııa oıyndary aıaqtaldy. Qazaqstan quramasy 84 medal oljalap, 46 eldiń ishinde jalpykomandalyq esepte segizinshi orynǵa turaqtady.
