Azııa oıyndaryna Astanadan 77 sportshy qatysady
ASTANA. KAZINFORM — Bıyl Astananyń 77 sportshysy Qazaqstannyń ulttyq quramalary sapynda HH jazǵy Azııa oıyndarynda el namysyn qorǵaıdy. Bul kórsetkish 2023 jylǵy Hanchjoýdaǵy Azııa oıyndarymen salystyrǵanda 67 paıyzǵa artyp, elordalyq sportshylar 30 sport túrinen baq synaıdy. Bul týraly Astana qalasynyń ákimdigi málim etti.
Ákimdiktiń dereginshe, Aichi-Nagoya 2026 HH jazǵy Azııa oıyndary Japonııada 19 qyrkúıek pen 4 qazan aralyǵynda ótedi. Jarys baǵdarlamasyna sporttyń 43 túri engizilip, 460 medal jıyntyǵy sarapqa salynady.
Qazaqstan ulttyq quramasynyń sapynda Astanadan 30 sport túrinen 77 sportshy baq synaıdy. Salystyrmaly túrde alsaq, 2023 jyly Qytaıdyń Hanchjoý qalasynda ótken jazǵy Azııa oıyndaryna elordanyń atynan sporttyń 18 túrinen 46 sportshy qatysqan.
— Bıyl qatysýshylar sany 31 sportshyǵa nemese 67 paıyzdan astamǵa artty. Astana ókilderi qatysatyn sport túrleriniń sany da 18-den 30-ǵa ósti. Elordalyq sportshylar basketbol, 3×3 basketbol, gandbol, boks, kúres, taekvondo, djıý-djıtsý, kórkem jáne sporttyq gımnastıka, sý sporttary, akademııalyq esý, baıdarka men kanoede esý, trıatlon, tennıs, ústel tennısi, at sporty, semserlesý, atý, jeńil atletıka, velosport, skeıtbordıng, sporttyq quzǵa órmeleý, breıkıng, kıbersport jáne padel boıynsha óner kórsetedi, — dep atap ótti Astana qalasynyń Dene shynyqtyrý jáne sport basqarmasy basshysynyń orynbasary Azamat Aǵzamov.
Qyrkúıek aıynda Qyrǵyz Respýblıkasynda VI Dúnıejúzilik kóshpendiler oıyndary aıaqtaldy.
Jarysqa 113 elden shamamen 3 myń sportshy qatysty. 152 sportshydan quralǵan Qazaqstan quramasy jalpykomandalyq esepte birinshi oryn aldy.
Astananyń atynan sporttyń jeti túrinen 13 sportshy qatysty. Olar dástúrli sadaq atýdan, mangaladan, mas-restlıngten, jilik syndyrýdan, goreshten, jorgo salyshtan jáne taıgandar jarysynan baq synady.
Elordalyq sportshylar jekeleı jáne komandalyq jarystarda júldeli oryndarǵa ıe bolyp, Qazaqstan quramasynyń jeńisine óz úlesin qosty.
Azııa oıyndarynan keıin halyqaralyq sport kúntizbesi Parazıada oıyndarymen jalǵasady. Bul jarysqa da Qazaqstan ulttyq quramasynyń sapynda Astana sportshylary qatysady.
— Sonymen qatar IV jazǵy jasóspirimder Olımpıadasy 31 qazan men 14 qarasha aralyǵynda Senegaldyń Dakar qalasynda ótedi. Jarysqa 14-17 jas aralyǵyndaǵy shamamen 2 700 sportshy qatysady dep josparlanyp otyr. Sportshylar 25 sport túrinen baq synaıdy.
Qazir sportshylardy irikteý jalǵasyp jatyr. Astanalyq trıatlonshy Ramazan Aınegov jasóspirimder Olımpıadasyna qatysý lıtsenzııasyn jeńip aldy. Ol jekeleı sprınt boıynsha óner kórsetedi. Elordalyq sportshylardyń halyqaralyq jarystardaǵy ókildiginiń keńeıýi Astanada sporttyń túrli baǵyttarynyń damyp kele jatqanyn jáne joǵary jetistikter sportyna arnalǵan rezervti júıeli daıarlaý jumysynyń jolǵa qoıylǵanyn kórsetedi, — dep qorytyndylady basqarma basshysy.
Eske sala keteıik, XX jazǵy Azııa oıyndaryna Qazaqstan ulttyq quramasynyń 558 sportshysy qatysady.
