Azııa oıyndary medaldary tanystyryldy

Medal tujyrymdamasy Oıyndardyń «Imagine One Asia» («Birtutas Azııany elestet») uranyna negizdelgen. Bul ıdeıa bir kezderi tutas bir keńistik bolǵan Azııa qurlyǵynyń ýaqyt óte kele san alýan til men mádenıetter qalyptasqan, ózindik erekshelikteri bar kóptegen óńirge bóliný tarıhyn beıneleıdi. Al medal sport arqyly qaıta birigýdi bildiredi.

Medal dızaınynyń avtory — japonııalyq dızaıner ári kreatıvti dırektor Daısýke Sıba. Onyń jobasy arnaıy baıqaýda úzdik dep tanyldy. Baıqaýǵa dızaın mamandyǵynda bilim alyp júrgen stýdenttermen qatar, osy salada kásibı tájirıbesi bar mamandar da qatysa aldy.

Dızaındy ázirleý barysynda Sıba keramıkalyq dıskilerdi birneshe ret syndyryp, paıda bolǵan bólshekterdi zerttegen. Bolashaq medaldiń tabıǵı ári kózge tartymdy pishini tabylǵanǵa deıin bul jumys jalǵasa bergen.

Avtordyń aıtýynsha, bul úderis sportshylardyń aıtýly jarystarǵa deıingi júrip ótken jolyn kórsetedi. Sporttyq jolynda olar talaı qıyndyqqa tap bolyp, san túrli synaqtan ótedi. Sol joldaǵy árbir eńbek pen kúsh-jiger aqyrynda bir jerge toǵysyp, sportshynyń jetken jetistigin aıshyqtaıtyn medalǵa aınalady.

Medaldar jeńis dárejesine qaraı ártúrli materıaldan jasalady. Salmaǵy shamamen 265 gramm bolatyn altyn medal taza kúmisten daıyndalyp, keminde 1 gramm altynmen qaptalady. Kúmis medal taza kúmisten jasalady jáne onyń salmaǵy shamamen 264 gramm bolady. Al qola medal quramynda 95 paıyz mys jáne 5 paıyz myrysh bar qyzyl jezden daıyndalady. Onyń salmaǵy shamamen 222 gramm.

Medaldardy ázirleý kezinde uıymdastyrýshylar qorshaǵan ortaǵa uqypty qaraý qaǵıdatyn ustandy. Olardyń óndirisine qajetti metaldardyń bir bóligi arnaıy Aichi-Nagoya 2026 Recycled Medal Project baǵdarlamasyna qatysqan mýnıtsıpalıtetter jınaǵan shaǵyn elektrondy qurylǵylardan alyndy. Bul bastama materıaldardy qaıta paıdalanýǵa jáne ekologııalyq ustanymdardy nasıhattaýǵa baǵyttalǵan.

Medal taspasynyń dızaınyna da erekshe kóńil bólindi. Onyń negizgi elementi — kakıtsýbata (japon qurtqashashy) gúliniń sulbasy. Bul — Aıchı prefektýrasynyń resmı gúli. Sonymen qatar taspa dızaınynda osy ósimdik japyraqtarynyń pishininen shabyttanǵan ıilgen doǵalar qoldanylǵan. Taspanyń ásem pishini sportshylardyń symbatty ári myqty bolmysyn jetkizýdi, sondaı-aq, Aıchı mádenıetin álemniń basqa bólikterimen baılanystyrý jáne ony bolashaq urpaqqa jetkizý ıdeıasyn bildiredi.

Medaldiń erekshe elementteriniń biri — oǵan arnalǵan qaptama. Onyń syrtqy jáne ishki pishini segiz qyrly etip jasalǵan. Qaptamany bezendirýde «八» («segiz») ıeroglıfi qoldanylǵan. Tarıhı turǵydan bul tańba bir kezderi qazirgi Aıchı prefektýrasynyń aýmaǵyn basqarǵan Ovarı Tokýgava áýletiniń emblemasynda bolǵan. Sonymen qatar ol qazirgi Nagoıa qalasynyń emblemasynda da qoldanylady.

Ieroglıftiń syrtqa qaraı keńeıe túsetin pishini qazirgi ýaqyttan bolashaqqa qaraı qozǵalysty beıneleıdi. Sondaı-aq uzaq merzimdi damý men órkendeýge degen úmitti bildiredi.

Qaptamany jasaý kezinde uıymdastyrýshylar óńirdiń mádenı murasyna da nazar aýdarǵan. Aıchı prefektýrasynda shaı rásimi ejelden qalyptasqan dástúr. Bul rásimde baǵaly shaı quraldaryn ádette aǵash jáshikterde saqtaıdy. Osy dástúrdi eskere otyryp, medaldiń qaptamasy Aıchıde ósiriletin japon kıparısi — hınokı aǵashynan jasalǵan.

Uıymdastyrýshylardyń aıtýynsha, 2026 jylǵy Azııa oıyndarynyń medali sport ıdeıasyn óńirdiń tarıhy, tabıǵaty, mádenıeti jáne zamanaýı ekologııalyq qaǵıdattarymen baılanystyrady. Medaldiń pishini men faktýrasynan bastap, taspasy men aǵash qaptamasyna deıingi árbir bólshek sportshylar, qabyldaýshy tarap jáne sport arqyly birtutas Azııa arasyndaǵy baılanysty aıshyqtaýǵa baǵyttalǵan.