Azııa oıyndary: Qazaqstandyq sportshylar saltanatty ashylý rásiminde delegatsııalar sherýinde júrip ótti

Qazaqstan ulttyq quramasy Qytaıdyń Hanchjoý qalasynda búgin XIX jazǵy Azııa oıyndarynyń saltanatty ashylý rásiminde delegatsııalar sherýinde júrip ótti, dep habarlaıdy QazAqparat tilshisi.

Dúbirli dodada Azııa Olımpıada keńesi (AOK) quramyndaǵy 45 elden 12 500-den astam sportshy keledi dep kútilýde. Bul - rekordtyq kórsetkish.

Qytaı tóraǵasy Sı Tszınpın 19-shy Azııa oıyndarynyń ashylý saltanatyna qatysyp otyr. Ol dúbirli dodany ashyq dep jarııalaıdy dep josparlanyp otyr.

2018 jyly Indonezııada ótken Azıadada 11 300 adam tirkelip, jańa rekordtyq kórsetkish ornaǵan edi.

Jazǵy Azııa oıyndarynda 8 sport túrinen Parıj Olımpıadasyna joldama beriledi. Básekede 40 sport túrinen júldeler sarapqa salynady.

Onyń ishinde Olımpıada baǵdarlamasyna kiretini 27, qalǵan úsheýi - olımpıadalyq emes sport túri. Elimiz mundaı mańyzdy sharaǵa óz tarıhynda segizinshi márte qatysady.

Dúbirli dodanyń saltanatty ashylý rásiminde elimizdiń atynan bokstan ulttyq qurama kapıtany Aslanbek Shymbergenov pen bıiktikke sekirýden kóshbasshymyz Nadejda Dýbovıtskaıa tý ustap shyqty.

Aslanbek 1993 jyly 9 qazanda Jambyl oblysynda dúnıege kelgen. Ol – bokstan álem jáne Azııa chempıony, Djakartadaǵy jazǵy Azııa oıyndarynyń kúmis júldegeri.

Al Nadejda 1998 jyly 12 naýryzda Semeı qalasynda dúnıege kelgen.

Bıyl elimizdiń atynan Hanchjoý qalasynda 30 sport túrinen 524 qazaqstandyq (262 er, 262 áıel) sańlaq baq synaıdy.