Azııa oıyndary: Ertýǵan Zeınýllınov mońǵolııalyq boksshyǵa ese jiberdi

Hanchjoýda (Qytaı) ótip jatqan Azııa oıyndarynyń boks týrnırinde Qazaqstan quramasynan Ertýǵan Zeınýllınov jarys jolyn aıaqtady, dep habarlaıdy QazAqparat. 

63.5 keli salmaqta baq synaǵan Ertýǵan Zeınýllınov 1/4 fınalda súrindi. Otandasymyz álem chempıonatynyń kúmis júldegeri, mońǵolııalyq Baatarsýh Chınzorıgten jeńildi.

Aıta keteıik, búgin sonymen qatar Karına Ibragımova Azııa oıyndarynyń 1/4 kezeńinde mońǵol sportshysy Namýýn Monhordy 5:0 esebimen utyp, jartylaı fınalǵa ótti. Ol bokstan Parıjge alǵashqy joldamany jeńip aldy.

Saǵyndyq Toǵambaı alań qojaıyny Han Sıýechjennen jeńilip, qola medal aldy.

Al Natalıa Bogdanova 66 kelige deıingi salmaq dárejesiniń shırek fınalynda Mońǵolııa ókili Tsetsegdarı Mıagmarsýrenmen judyryqtasyp, tóreshilerdiń biraýyz sheshimimen jeńiske jetti. Osylaısha ol qurlyq birinshiliginiń jartylaı fınalyna shyǵyp, ózin keminde qola júldemen qamtamasyz etti.

Buǵan deıin 1 qazanda sharshy alańǵa shyǵatyn boksshylardyń kestesin jarııalaǵan bolatynbyz.