Azııa oıyndary: Búgin Qazaqstan quramasynan tórt boksshy sharshy alańǵa shyǵady

Búgin, 1 qazanda Hanchjoýda (Qytaı) ótip jatqan Azııa oıyndarynda Qazaqstan quramasynan tórt boksshy sharshy alańǵa shyǵady. QazAqparat bul týraly Sports.kz saıtyna silteme jasap habarlaıdy. 

Kúndizgi sessııada Qazaqstan atynan eki sportshy qatysady. Astana ýaqytymen saǵat 13:15-te Natalıa Bogdanova sharshy alańǵa shyǵady. 66 kelige deıingi salmaqta óner kórsetetin sportshymyz shırek fınalda mońǵolııalyq Tsetsegdarı Mıagmarsýrenmen kezdesedi.

Saǵat 14:45-te 92 kelige deıingi salmaqtaǵy Saǵyndyq Toǵambaı jartylaı fınaldyq jekpe-jek ótkizedi. Ol qytaılyq Han Sıýechjenmen judyryqtasady. Bul jekpe-jekterdiń tikeleı translıatsııasyn Qazaqstan telearnasynan kórýge bolady.

Keshki sessııada Qazaqstannyń eki sportshysy sharshy alańǵa shyǵady. Saǵat 17:15-te 57 kelige deıingi salmaqta Karına Ibragımova mońǵolııalyq Namýýn Monhormen shırek fınaldyq jekpe-jek ótkizedi.

Saǵat 19:00-de 63,5 kelige deıingi salmaqtaǵy shırek fınalda Ertýǵan Zeınýllınov Mońǵolııanyń taǵy bir ókili Chınzorıg Baatarsýhıınmen kezdesedi. Bul jekpe-jekterdi Qazsport telearnasy tikeleı efırde kórsetedi.

Qazaqstan quramasynyń 30 qyrkúıektegi nátıjesine toqtalar bolsaq, bokstan Qazaqstan quramasynyń kapıtany Aslanbek Shymbergenov (71 kg) Azııa oıyndarynyń jartylaı fınalyna ótti. Ol Ózbekstannan kelgen álem chempıony Asadhýdja Mýıdınhýdjaevty nokaýtpen jeńdi.

Qamshybek Qońqabaev (+92 kg) Bahreın boksshysy Danıs Latypovty 5:0 esebimen jeńip, Azıadanyń jartylaı fınalyna senimdi túrde ótti.

Qazaqstandyq baıdarka men kanoede esýshiler Azııa oıyndarynyń fınalynda birden 5 túrli saıys boıynsha baq synaıdy. Voleıboldan Qazaqstan áıelder quramasy Aýǵanstannan ozyq shyqty. Esep-3:0.

7-shi jarys kúniniń qorytyndysy boıynsha Qazaqstan quramasynyń qorjynynda 3 altyn, 4 kúmis jáne 19 qola júlde bar.