Azııa oıyndary: Boks pen kúresten bul joly qaı el kóp «altyn» alady
ASTANA.KAZINFORM – Jazǵy Azııa oıyndary boks jankúıerleri úshin Ózbekstan men Qazaqstan arasyndaǵy teketirespen qyzyq bolmaq. Búgingi sholýda el namysyn qorǵaıtyn bylǵary qolǵap sheberleriniń múmkindikterin saralaımyz.
Japonııanyń Aıchı jáne Nagoıa qalalarynda ótetin Azıada-2026 dodasy qurlyq deńgeıindegi myqtylardy ǵana anyqtap qoımaı, spolrtshylardyń Los-Andjeles-2028 Olımpıadasyna daıyndyq deńgeıin tekserýge múmkindik beredi. Onyń úsitne jekpe-jekke qurylǵan sport túrlerinen qatysatyn quramalardyń kóbi quramyn jańartyp barǵaly otyr.
Basqasha aıtsaq, óz salmaǵynda «favorıt» sanalatyn sportshylardyń básekesi de, tyń esimderdiń tegeýrinin tamashalaý da jankúıer qaýym úshin qyzyq bolmaq. Al bul sporttan sensatsııa izdeıtinderge tipten qyzyq.
Boks (erler): Ózbekstan qandaı tosyn syımen barady?
Qazaqstan men Ózbekstan Nagoıaǵa jańarǵan qurammen keledi. Sondyqtan salmaq dárejeleriniń kóbinde eki el ókilderiniń arasynda tartysty aıqastar kútiledi.
90 keliden joǵary: Aıbek Oralbaı – Jahongır Zokırov
Azııa chempıony Aıbek Oralbaıǵa jastar arasyndaǵy álem chempıony, ózbekstandyq sýperaýyr salmaqtaǵy Jahongır Zokırov qarsy turady. Bul – asa aýyr salmaqtaǵy basymdyq úshin mańyzdy aıqas. Munda jeńiske jetken boksshy Los-Andjeles Olımpıadasyna deıingi kezeńde óz salmaǵyndaǵy kóshbasshylyqqa eleýli qadam jasaıdy.
90 kelige deıin: Nurbek Oralbaı – Týrabek Habıbýllaev
Parıj Olımpıadasynyń kúmis júldegeri, álem chempıony Nurbek Oralbaıǵa ótken Azıadanyń júldegeri Týrabek Habıbýllaev jolyǵýy múmkin. Ózbek boksshysy iri jeńisterge umtylyp júr. Al Nurbek úshin bul týrnır álemdegi úzdik jartylaı aýyr salmaqtaǵy boksshylardyń biri retindegi mártebesin bekitýge múmkindik beredi.
70 kelige deıin: Tórehan Sabyrhan – Shavkatjon Boltaev
Bul – jas talanttardyń teketiresi. 18 jastaǵy qazaqstandyq boksshy, jastar arasynda Azııanyń tórt dúrkin chempıony Tórehan Sabyrhan Azıadadaǵy alǵashqy jekpe-jegin ótkizedi. Onyń qarsylasy – ózbekstandyq myqty boksshy Shavkatjon Boltaev. Bul aıqas Tórehannyń eresekter arasyndaǵy elıtaǵa birden enýge qanshalyqty daıyn ekenin kórsetedi.
60 kelige deıin: Orazbek Asylqulov – Abdýmalık Halokov
Tehnıkalyq sheberligimen tanylǵan Orazbek Asylqulovty asa kúrdeli synaq kútip tur. Onyń yqtımal qarsylasy – Parıj Olımpıadasynyń qazirgi chempıony, álem chempıony ári ótken Azıada jeńimpazy Abdýmalık Halokov. Ózbekstandyq boksshyny jeńý Orazbek úshin týrnırdegi eń iri sensatsııalardyń birine aınalýy múmkin.
55 kelige deıin: Mahmud Sabyrhan – Samandar Olımov
«Qazaqtyń Lomachenkosy» atanǵan Mahmud Sabyrhan 55 kelige deıingi salmaqtaǵy mansabyn jańa kezeńnen bastaıdy. Azıadada oǵan ózinen jas ózbekstandyq talant Samandar Olımov qarsy turýy múmkin.
Boks (áıelder): Kil myqtylar jáne kúrdeli jerebe
Qazaqstan áıelder quramasy Nagoıaǵa myqty qurammen barady. Alaıda altynǵa aparar jolda álemdik rıngtiń eń myqty boksshylarymen kezdesýler kútip tur.
51 kelige deıin: Alýa Balqybekova – ıÝı Ý (Qytaı)
Bul áıelder arasyndaǵy týrnırdiń eń qyzyqty jekpe-jekteriniń biri bolýy múmkin. Eki dúrkin álem chempıony Alýa Balqybekova Parıj Olımpıadasynyń qazirgi chempıony ári Azııa chempıony qytaılyq ıÝı Ýmen kezdesedi.
54 kelige deıin: Nazym Qyzaıbaı – Pan Chhol Mı (KHDR) / Hýan Sıaoven (Taıbeı)
Parıj Olımpıadasynyń qola júldegeri Nazym Qyzaıbaıdyń»altynǵa» aparar joly ońaı bolmaıyn dep tur. Jeńis tuǵyryna kóterilý úshin oǵan eki dúrkin álem chempıony, Soltústik Koreıa ókili Pan Chhol Mı men taıbeılik úsh dúrkin álem chempıony Hýan Sıaovennen bıik sheberlik kórsetý kerek. Bul qarsylastardyń árqaısysymen ótetin jekpe-jek Olımpıada fınalyna tatıtyn tartys bolmaq.
Bozkilemdegi tartys
Azııadadaǵy kúres básekesinde Irannyń fızıkalyq daıyndyǵy, Japonııanyń tehnıkalyq sheberligi jáne Ortalyq Azııa balýandarynyń qaısarlyǵy toǵysady.
Grek-rım kúresi, 77 kelige deıin: Demeý Jadraev – Nao Kýsaka (Japonııa) / Amın Kavııanınedjad (Iran)
Parıj Olımpıadasynyń kúmis júldegeri Demeý Jadraev Japonııada óz babyn qaıta dáleldeýge bara jatyr. Onyń japon balýandarymen óz jerinde kezdesýi, sondaı-aq Irannyń myqty ókilderimen beldesýi týrnırdiń basty oqıǵalarynyń birine aınalýy múmkin. Ár beldesý Demeýdiń Los-Andjeles-2028 Olımpıadasyna daıyndyǵy qalaı bastalǵanyn da kórsetpek.
Erkin kúres, 57 kelige deıin: Nurdanat Aıtanov – Aman Sehravat (Úndistan) / Gýlomjon Abdýllaev (Ózbekstan)
Qazaqstandyq jas balýan Nurdanat Aıtanov erkin kúrestiń tájirıbeli sheberleri shoǵyrlanǵan salmaqta synǵa túsedi. Nagoıadaǵy basty qarsylastarynyń qatarynda Úndistannyń Olımpıada júldegeri Aman Sehravat pen Ózbekstannyń Olımpıada júldegeri Gýlomjon Abdýllaev bar. Bul synda uzdik shyqsa, Nurdanat Azııa deńgeıindegi myqtylardyń qatarynan ornyn oıyp alady.
Erkin kúres, 97 kelige deıin: Rızabek Aıtmuhan – Arash Ioshıda (Japonııa) / Amıralı Azarpıra (Iran) / Dıpak Pýnııa (Úndistan)
Qazaqstan tarıhyndaǵy erkin kúresten tuńǵysh álem chempıony Rızabek Aıtmuhan 97 kelige deıingi Olımpıadalyq salmaqta kúrdeli synaqqa daıyndalyp jatyr. Azıada-2026 bozkilemine Bahreın atynan óner kórsetetin reıtıng kóshbasshysy Ahmed Tajýdınovtyń barmaıtynyna qaramastan, bul salmaqtaǵy báseke joǵary bolmaq. Ásirese japondyq Arash Ioshıda, ırandyq Amıralı Azarpıra jáne tájirıbeli úndistandyq Dıpak Pýnııa sekildi balýandardyń qaı-qaısysy da Azııadaǵa altynnan úmittenip barady.
