Azııa oıyndary: Basketboldan Qazaqstan erler quramasy BAÁ-men kezdesti

Qytaıdyń Hanchjoý qalasynda ótip jatqan XIX jazǵy Azııa oıyndarynda basketboldan Qazaqstan erler quramasy Birikken Arab Ámirlikterimen kezdesti, dep habarlaıdy QazAqparat tilshisi.

El quramasy A tobynda synǵa túsedi. Qarsylastary - Iran, Saýd Arabııasy jáne Birikken Arab Ámirlikteri.

Búgingi kezdesýde qazaqstandyq basketbolshylar qarsylasynan 59:49 esebimen basym tústi.

Endi olar 30 qyrkúıekte Iranmen sheberlik baıqasady.

Aıta ketsek, el quramasy budan buryn Saýd Arabııasyna 62:86 esebimen ese jiberdi.

Elimizdiń erler quramasy qazirge deıin Azııa oıyndaryna jeti márte qatysty. Joǵary jetistigi - 2002 jyly alǵan qola medal.

Eske salsaq, budan buryn elimizdiń áıelder quramasy Qazaqstan áıelder quramasy Fılıppınge ese jiberdi.

Endi olar 29 qyrkúıekte Japonııa, 1 qazanda Gonkong quramalarymen kezdesedi.