Azııa oıyndary: Basketboldan Qazaqstan áıelder quramasy Fılıppınge ese jiberdi

Qytaıdyń Hanchjoý qalasynda ótip jatqan XIX jazǵy Azııa oıyndarynda basketboldan Qazaqstan áıelder quramasy Fılıppınmen kezdesti, dep habarlaıdy QazAqparat tilshisi.

Qazaqstandyq sportshylar V tobynda synǵa túsedi. Qarsylastary - Japonııa, Gonkong jáne Fılıppın.

Kezdesý barysynda el quramasy qarsylasyna 59:83 esebimen ese jiberdi.

Eki qurama buǵan deıin 2015 jyly Azııa kýbogynda bir márte sheberlik baıqasty. Ol joly Fılıppın quramasy 80:73 esebimen basym túsken edi.

Endi el quramasy 29 qyrkúıekte Japonııa, 1 qazanda Gonkong quramalarymen kezdesedi.

Basketboldan Qazaqstan áıelder quramasy Azııa oıyndaryna besinshi márte qatysyp otyr. Buǵan deıin 1994, 1998, 2014, 2018 jyldarda jalpy esepte besinshi orynǵa turaqtady.