Azııa oıyndary-2026: Qazaqstan UOK Chefs de Mission semınaryna qatysty

ASTANA. KAZINFORM – Japonııanyń Nagoıa qalasynda 2026 jylǵy Aıchı-Nagoıa Azııa oıyndaryna qatysýshy elderdiń delegatsııa jetekshilerine arnalǵan semınar ótti.

Qazaqstan Ulttyq Olımpıadalyq komıteti atynan Sport departamentiniń bas menedjeri Roman Temirjanov pen Halyqaralyq baılanystar departamentiniń bas menedjeri Tatıana Bogoslovskaıa qatysty.

Azıadany uıymdastyrýshylar logıstıka, kólik qozǵalysy, komandalardy ornalastyrý, akkredıtatsııa, medıtsınalyq jáne dopıngke qarsy qyzmetter, tamaqtaný, resmı rásimder men BAQ-pen jumys sekildi daıyndyqtyń negizgi baǵyttary týraly jan-jaqty baıandady. Sonymen qatar qatysýshylar bılet satý júıesimen jáne Oıyndar brendıngin qorǵaý erejelerimen tanysty.

Sportshylardyń turatyn jaǵdaıyna erekshe nazar aýdaryldy. Nagoıada dástúrli Olımpıada qalashyǵyn salý josparlanbaǵan. Qatysýshylardyń bir bóligi porttaǵy krýızdik kemede, al qalǵany arnaıy jabdyqtalǵan turǵyn úıler men qonaqúılerde turady. Qazaqstandyq delegatsııa sportshylar synǵa túsetin jáne ornalasatyn nysandardy óz kózimen aralap kórdi.

- Bizdiń basty maqsatymyz - daıyndyq barysyn óz kózimizben kórý jáne kókeıdegi suraqtarǵa jaýap alý boldy. Endi bizde tolyq aqparat bar, ony federatsııalar men sportshylarǵa jetkizemiz. Sonymen qatar uıymdastyrý komıtetimen jáne basqa elderdegi áriptesterimizben tikeleı sóılesýge múmkindik aldyq. Bul bizge týyndaýy múmkin jaǵdaılardy aldyn ala eskerip, ulttyq quramanyń qatysýyn barynsha yńǵaıly etýge kómektesedi, - dedi Roman Temirjanov.

Sondaı-aq 23 qyrkúıekte uıymdastyrý komıteti Nagoıa telemunarasynda «One Year to Go» atty shara ótkizdi. Baǵdarlamaǵa mádenı qoıylymdar, jaryq shoýy jáne UOK-tarǵa resmı shaqyrý tapsyrý rásimi kirdi.

Aıta keteıik, gımnast Dmıtrıı Patanın Vengrııadaǵy Challenge Cup kezeńinde altyn medal jeńip aldy.