Azııa oıyndary-2026: 24 sheteldik maman tartyldy
ASTANA.KAZINFORM — 19 qyrkúıek pen 4 qazan aralyǵynda Japonııanyń Aıtı prefektýrasy men Nagoıa qalasynda ótetin XX jazǵy Azııa oıyndaryna ulttyq quramanyń daıyndyǵyna arnalǵan jıyn ótti. Bul týraly Týrızm jáne sport mınıstrligi málim etti.
Jıynǵa jazǵy sport túrleri boıynsha ulttyq sport federatsııalarynyń basshylary qatysty. Kezdesýde ulttyq quramalardyń qazirgi daıyndyq deńgeıi, sportshylardyń halyqaralyq jarystardaǵy nátıjeleri, bekitilgen josparlardyń oryndalýy, sondaı-aq medıtsınalyq, materıaldyq-tehnıkalyq jáne uıymdastyrýshylyq qamtamasyz etý máseleleri qaraldy.
— XX jazǵy Azııa oıyndaryna 45 elden 15 myńǵa jýyq sportshy qatysady dep josparlanǵan. Jarys barysynda 469 medal jıyntyǵy sarapqa salynady. Qazaqstan quramasy sporttyń 35 túrinen synǵa túsýdi josparlap otyr, — delingen habarlamada.
Jyl basynan beri qazaqstandyq sportshylar sporttyń 68 túrinen 282 halyqaralyq jarysqa qatysty. Onyń ishinde 26 álem chempıonaty, 71 Álem kýboginiń kezeńi, 37 Azııa chempıonaty jáne 148 halyqaralyq týrnır bar. Sonymen qatar Sportty damytý dırektsııasy 226 oqý-jattyǵý jıynyn uıymdastyrdy. Jattyqtyrýshylar quramyn kúsheıtý maqsatynda sporttyń 13 túri boıynsha 11 elden 24 sheteldik maman tartyldy.
Jıyn qorytyndysynda qabyldanǵan mindettemelerdiń oryndalýyn qamtamasyz etý, ulttyq quramalardyń daıyndyǵyn baqylaýdy kúsheıtý jáne týyndaǵan máselelerdi jedel sheshý qajeti atap ótildi. Mınıstrlik Ulttyq Olımpıada komıteti jáne sport federatsııalarymen birlesip, Qazaqstan quramasynyń XX jazǵy Azııa oıyndarynda tabysty óner kórsetýine qajetti barlyq jaǵdaıdy jasaý baǵytyndaǵy jumysty jalǵastyrady.
Kezdesý aıasynda federatsııa basshylary Astanadaǵy Qazaq ulttyq sport ýnıversıtetiniń ınfraqurylymymen de tanysty. Jańa ýnıversıtet Ortalyq Azııadaǵy sport ǵylymy men mamandar daıarlaý salasyndaǵy eń iri bilim berý jobalarynyń birine aınaldy. Munda jattyqtyrýshylyq qyzmet, sport ǵylymy, sporttyq medıtsına jáne ońaltý, menedjment, sport jýrnalıstıkasy, analıtıka jáne basqa da baǵyttar boıynsha mamandar daıarlaýǵa zamanaýı jaǵdaı jasalǵan.
