Azııa Olımpıadalyq keńesi Indıra Bektenovaǵa dıplom men medal tabys etti
ASTANA. QazAqparat - Koreıa Respýblıkasynyń Inchhon qalasynda ótken XVII jazǵy Azııa oıyndarynan jedel aqparat taratyp, Azııa kontınentindegi olımpıada qozǵalysynyn damýyna qosqan súbeli úlesi úshin Azııa Olımpıadalyq keńesi «KazSPORT» telearnasynyń redaktor-júrgizýshisi Indıra Bektenovaǵa alǵys bildirdi, dep habarlady «Qazaqstan» RTRK baspasóz qyzmetinen.
Atalǵan sport dodasyn dúıim jurtqa jarııalaǵan bir top otandyq jýrnalısterdiń arasynan sýyrylyp shyǵyp, Azııalyq Olımpıada Keńesiniń prezıdenti Sheıh Ahmad ál-Fahad ál-Sabah myrzanyń atynan Indıra Baqytjanqyzyna dıplom men estelik medal tabys etildi. Qurmet-qoshamet kórsetý arqyly Oıyndardy Uıymdastyrý komıteti qazaqstandyq jýrnalısterdiń eńbegine joǵary baǵa berip otyr.
Indıra Bektenova - «KAZsport» telearnasynyń redaktory, «Qazaqstan» Ulttyq telearnasynyń sport jańalyqtarynyń, «Tańsholpan» baǵdarlamasynyń tańǵy jattyǵýlar aıdarynyń, Qazaq radıosynda «Sport.kz» baǵdarlamasynyń júrgizýshisi. Ol Sochıde ótken Qysqy Olımpıada oıyndary men Inchhonda aıaqtalǵan Jazǵy Azııa oıyndarynan qazaqstandyq kórermenderge habar taratty. «Indıra sportqa kezdeısoq kelgen joq. Ol karate do shotokan boıynsha QR Kýboginiń ıegeri, karate do shotokan boıynsha ulttyq dárejedegi tóreshi, karateden qara belbeýdiń ıegeri, djetkýndo boıynsha qara belbeý ıegeri», delingen habarlamada.
