Azııa Olımpıadalyq keńesi 7-nshi qysqy Azııa oıyndarynyń Alaýy tutandyrylatyn oryndy bekitti

Bul - Ál-Kýáıt qalasynda ornalasqan «Kýveıt-Taýers» munaralarynyń alańy.

Buǵan deıin habarlanǵandaı, Qysqy Azııa oıyndarynyń shejiresinde alǵash uıymdastyrylǵaly otyrǵan Alaý estafetasy 2011 jyldyń 11 qańtarynda AOK-nyń shtab-páteri ornalasqan Ál-Kýáıt qalasynda bastaý alady. Aıta keteıik, buǵan deıin Alaýdy tutandyrý rásimi oıyndy qabyldaýshy elde ótkizilip keldi. Al 2011 jylǵy Azıadadan keıin Alaýdy tutandyrý dástúri Azııa olımpıadalyq qozǵalysynyń otanynda qalyptasatyn bolady.

Azııa oıyndaryn uıymdastyrý jáne ótkizý jónindegi Astana qalalyq dırektsııasynan málim etkendeı, AOK qazaqstandyq Azıadanyń Alaýyn Ál-Kýáıt qalasynda ornalasqan «Kýveıt-Taýers» munaralarynyń alańynda tutandyrý sheshimin qabyldady. Sebebi «Kýveıt-Taýers» munaralary tek Kýáıttiń nyshany ǵana emes, olar sondaı-aq Astana men Kýáıtti jalǵastyrýshy nysandar bolyp tabylady. Ǵımarattardyń sáýlettik dızaıny Astanadaǵy QR Aýyl sharýashylyǵy mınıstrligi ornalasqan ǵımarattyń kóshirmesi dep aıtýǵa bolady. Bul ǵımarattardyń sýretin árbir qazaqstandyq 500 teńgelik kýpıýralardan da kóre alady.

«Alaýdy tutandyrý saltanaty týraly barlyq qupııany asha almaımyz. Rásim basynan-aıaǵyna deıin ortalyq telearnalardan tikeleı efır arqyly kórsetiledi. Kórermenderdiń qyzyǵýshylyǵyn arttyra túsý úshin, rásim áserli shoý-baǵdarlamamen súıemeldenetindigin aıta alamyn», - dedi Astana qalalyq dırektsııasynyń dırektory Naıl Nurov.

12 qańtar kúni Alaý Qazaqstanǵa jetkizilip, óńirler boıynsha 20 kún saıahattaıdy. Onyń sońǵy núktesi (30 qańtar) Oıyndardyń saltanatty ashylý rásimi ótetin - «Astana -Arena» stadıony.