Azııa ınfraqurylymdyq ınvestıtsııalar banki Qazaqstandy kómirtegi beıtaraptyǵyna qol jetkizýde qoldaýǵa daıyn
ASTANA. KAZINFORM – QR Premer-Mınıstriniń orynbasary – ulttyq ekonomıka mınıstri Nurlan Baıbazarov Azııa ınfraqurylymdyq ınvestıtsııalar bankiniń (AIIB) vıtse-prezıdenti Konstantın Lımıtovskıı bastaǵan delegatsııa múshelerimen kezdesý ótkizdi, dep habarlaıdy Úkimettiń baspasóz qyzmeti.
Dıalog barysynda qonaqtarǵa elimizdegi qazirgi makroekonomıkalyq jaǵdaı, ınvestıtsııalyq ahýaldy jaqsartý boıynsha atqarylyp jatqan jumystar, ınfraqurylym men óńdeý ónerkásibi salasyndaǵy jańa baǵdarlamalar men jobalar týraly aqparat berildi.
Bank qyzmetiniń ereksheligin eskere otyryp, Qazaqstanda kólik, energetıka, sý jáne áleýmettik ınfraqurylymdy jańǵyrtý men salýǵa baǵyttalǵan Úkimettiń bastamalaryna erekshe nazar aýdaryldy.
«Biz Azııa ınfraqurylymdyq ınvestıtsııalar bankimen odan ári yntymaqtastyqtyń keleshegin joǵary baǵalaımyz. Qazaqstannyń jańa ınvestıtsııalyq tsıklge aıaq basyp otyrǵanyn ári búgingi tańda halyqaralyq qarjy ınstıtýttarymen qatar jeke ınvestorlardy da ınvestıtsııalyq turǵydan qyzyqtyratyn birqatar iri jobalardy usynyp otyrǵanyn atap ótkim keledi», — dedi vıtse-premer.
Konstantın Lımıtovskıı Qazaqstan AIIB quryltaıshylarynyń biri retinde bankti qurý men damytýda eleýli ról atqarǵanyn atap ótti. Yntymaqtastyqty keńeıtýdiń orasan zor áleýetin moıyndaı otyryp, AIIB Qazaqstannyń Ulttyq damý josparyn tabysty júzege asyrýǵa úles qosýǵa, sondaı-aq 2060 jylǵa qaraı kómirtegi beıtaraptyǵyna qol jetkizý úshin dekarbonızatsııaǵa degen umtylysyn qoldaýǵa daıyn.
AIIB men QR Ulttyq ekonomıka mınıstrligi arasyndaǵy kezdesý aıasynda úsh jyldyq ınvestıtsııalyq jospardy birlesip ázirleý nıeti týraly Deklaratsııaǵa qol qoıyldy, ol yqtımal qarjylandyrý úshin sektorlardy, salalar men jobalardy kórsetetin bolady.
