Azııa halqynyń 20 paıyzy kedeıshilikte ómir súrýde - ADB prezıdenti Takehıko Nakao
ASTANA. QazAqparat - Azııa halqynyń 20 paıyzy kedeıshilikte ómir súrip jatyr. Bul týraly búgin Azııa damý banki Basqarýshylar keńesiniń 47-shi otyrysynda ADB prezıdenti Takehıko Nakao málim etti.
«ADB-nyń 2020 jylǵa deıingi strategııasynyń ortamerzimdi sholýynda atap kórsetilgendeı, óńirdegi negizgi másele kedeıshilikpen kúres bolyp qalýda. 700 mıllıonnan astam adam kedeıshilikte ómir súrýde, ıaǵnı táýligine 1,25 dollarǵa kún kórýde. Bul kórsetkish Azııa halqynyń 20 paıyzyn jáne barsha álemdegi kedeı halyqtyń jalpy kóleminde 60 paıyzyn quraıdy», - dedi ol.
Onyń sózine qaraǵanda, 1,6 mlrd. adam táýligine 2 dollardan kem qarjyǵa kúneltýde. Olar jumysynan aıyrylý, egistikterdiń ónim bermeı qalýy, ınflıatsııa sekildi joǵary táýekelderge ushyraǵysh bolyp keledi. Óńirdegi elderdiń ishinde jáne olardyń arasynda teńsizdiktiń úlesi artyp keledi.
«ADB maqsaty - qatysýshy damýshy memleketterge kedeıshilikti joıýǵa kómektesý jáne teńsizdikti qysqartý úshin ósimnen túsken ıgilikti halyqtyń túrli toptaryna taratýǵa qoldaý kórsetý», - dedi Takehıko Nakao.
