Azııa fýtbol kýbogy: Tájikstan quramasy shırek fınalǵa shyqty

DOHA. KAZINFORM — Qatarda ótip jatqan fýtboldan Azııa kýbogynda Tájikstan quramasy shırek fınalǵa joldama aldy.

Tájikstan quramasy 1/8 fınalda Birikken Arab Ámirligi fýtbolshylarymen kúsh synasty.

Tájik fýtbolshylary qurlyqtyq dodaǵa bıyl tuńǵysh márte qatysyp otyr.

Soǵan qaramastan A tobynda Qytaı men Lıvandy artqa salyp, ekinshi orynǵa taban tiredi. Alda tek Qatar quramasy bar.

Búgingi kezdesýde tájikstandyq fýtbolshylar jaqsy oıyn órnegin kórsetti. Nátıjesinde Vahdat Hanonov 30-mınýtta qarsylas qurama qaqpasynan sańylaý taýyp ketti.

BAÁ quramasy alǵa qaraı umtyla tústi. Dese de birinshi kezeńde tablodaǵy esepke ózgeris engen joq.

Oıynnyń 95-mınýtynda olardyń qatarynan Halıfa Al-Hammadı tarazy basyn teńestirdi.

Osylaısha oıyn overtaımǵa ulasty. Overtaımda jeńimpaz anyqtalǵan joq. Penaltı serııasynda tájkistandyqtar múlt ketpeı, jarysty jalǵastyrýǵa múmkindik aldy.

Endi olar ¼ fınalda 2 aqpanda Irak jáne Iordanııa jubynyń jeńimpazymen kezdesedi.

Aıta ketsek, Tájikstan quramasy qurlyqtyq dodada tuńǵysh márte baq synap otyr.

Sondaı-aq, 1/8 fınalda Avstralııa quramasy Indonezııany 4:0 esebimen tize búktirip, shırek fınalǵa joldama aldy.

Jarystyń atalǵan satysynda 29 qańtarda Qatar men Palestına, Irak pen Iordanııa oınaıdy.

Al Ózbekstan quramasy 30 qańtarda 1/8 fınalda Taılandpen kezdesse, bul kúni Saýd Arabııasy men Ońtústik Koreıa sheberlik baıqasady.

31 qańtarda Iran men Sırııa, Bahreın men Japonııa jasyl alańǵa shyǵady.

Qurlyqtyq dodada F tobynda Saýd Arabııasy, Taıland, Omandy alǵa salyp, tórtinshi oryndy mise tutqan Qyrǵyzstan jarysty erte aıaqtady.