Azııa elderi arasynda robototehnıkadan biz aldamyz — robot tehnıkasynyń jattyqtyrýshysy
ASTANA. KAZINFORM — Astanalyq oqýshylar halyqaralyq STEAM Azerbaijan SAF-2025 festıvalinde top jardy. VEX IQ sanatynda 5-7 synyp oqýshylary 1-inshi jáne 3-orynsha orynǵa ıe bolsa, FlyTech & RoboSoccer sanatynda 9-synyp oqýshylary qola qanjyǵalady.
– Bul jolǵy jarystyń sanaty erekshe. Jyl saıyn erejeler aýysady. Baıqaýdyń erejesi aýyssa biz jańa robot qurastyramyz. Jańa bilim alyp, joǵary deńgeı kórsetýge tyrysamyz. Komandadaǵy balalar ózderiniń deńgeılerin dáleldedi. Draıvıng jáne baǵdarlamalaýdy kórsetip, eń joǵarǵy upaıdy aldy. Basqa komandalarǵa qaraǵanda bizdiń deńgeıimiz joǵary. Myqty taǵy 1-2 komanda boldy, biraq Azııa elderi arasynda biz aldamyz, - robototehnıka boıynsha jattyqtyrýshy Naǵashybaı Samyratov «Búgin LIVE» baǵdarlamasyna bergen suhbatynda.
Baǵdarlama qonaǵy aldaǵy ýaqytta iri básekelestermen baq synaǵysy keletinin aıtady.
– Bizdiń aldaǵy maqsatymyz Eýropa men Amerıkaǵa, Qytaıǵa barý. Onda eń myqty komandalar bar. Olarmen básekelesip, óz deńgeıimizdi kórsetkimiz keledi. Sebebi damý kerek. Biliktilikti arttyrý úshin myqtylarmen baq synasý qajet, – deıdi ol.
Al jarysqa qatysqan balalar qarsylasty qapy qaldyrý asa qıyn bola qoımaǵanyn aıtady.
– Saıystyń qıyn tustary da bar. Biraq qatty qıyn bolǵan joq. Kóp qatysýshylar ázerbaıjandyq. Olar bizden ozýǵa tyrysty. Biz de talpynyp, birinshi orynǵa jettik, – deıdi STEAM Azerbaijan SAF-2025 jeńimpazy Dıar Imanáli.
Eske sala keteıik, 15–20 qarasha aralyǵynda Baký qalasynda STEAM Azerbaijan SAF-2025 festıvali ótti. Baıraqty básekege 22 elden kelgen myńdaǵan jas talant qatysty. Álemniń ár túkpirinen jınalǵan daryndy balalar 16 negizgi jáne 2 qosymsha sanatta synǵa túsken.
Buǵan deıin Qazaqstan oqýshylarynyń robototehnıkadan Ulttyq quramasy Panama-Sıtıde ótken FIRST Global Challenge (FGC) 2025 Búkilálemdik Olımpıadasynda tórtinshi jyl qatarynan aıryqsha jeńiske jetkenin jazǵan edik.