Azııa elderi arasynda Qazaqstan hokkeıshileriniń deńgeıi joǵary – qytaılyq kórermen

HARBIN. KAZINFORM – Harbın qalasynyń turǵyny Van Rýı hokkeıden Qazaqstan men Qytaı quramalary arasyndaǵy kezdesýden keıin Kazinform tilshisine suhbat berdi. Ol áńgime arasynda qazaqstandyq hokkeıshilerdiń deńgeıi Azııa elderi arasynda joǵary ekenin aıtty. 

Qytaılyq kórermen 1996 jyly osy arenada eki el quramasy arasyndaǵy ótken kezdesýdi eske aldy. 

– Ol jyly Qazaqstan quramasy qatelespesem 22:0 esebimen jeńiske jetti. Bul joly Qytaı quramasy jaqsy oıyn kórsetti. 1 shaıba saldy. Qazaqstan hokkeı sporty boıynsha Azııa elderiniń arasynda aldyńǵy qatarda tur. Olardyń deńgeıi óte joǵary ekenin aıta ketken jón. Qazaqstandyq sportshylardyń denesi iri jáne kúshi myǵym. Oıynda barlyq jaǵynan basymdylyǵy aıqyn kórinip turdy, - deıdi Van Rýı. 

Onyń aıtýynsha, Qazaqstan hokkeıshileri fınalda Japonııamen chempıondyqqa talasýy múmkin.

– Qytaı quramasy júldeden úmitti. Aldyńǵy úshtikten kórinedi dep topshylaımyn. Al chempıondyq match Qazaqstan men Japonııa arasynda ótýi múmkin. Qazaqstan quramasyna sáttilik tileımin, - dedi qytaılyq kórermen.

Aıta keteıik, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.