«Azııa daýysy» festıvali qaıta ótkizile bastaıdy

ALMATY. QazAqparat – Almaty ákimdigi «Azııa daýysy» festıvalin qaıta jańǵyrtýdy josparlap otyr. Bul týraly Erbolat Dosaev málim etti, dep habarlaıdy QazAqparat tilshisi.

Qala ákimimen kezdesýge kelgen Áýezov aýdany turǵyndarynyń biri Almatyda ótetin mádenı is-sharalarǵa qatysty suraq qoıdy.

«Men jaqynda Dımash Qudaıbergenniń kontsertine bardym. 30 myńnan astam adam boldy, onyń jartysy – týrıst. Osyndaı kontsertterdiń jıi ótkizilip turǵanyn qalaımyn, osylaısha qalanyń mýzykalyq astanaǵa aınalýyna múmkindik týady – adamdar keledi, jumys oryndary ashylady. Bizde tanymal dıdjeı Imanbek bar, ony da shaqyrýǵa bolady. Almatynyń mádenıet pen mýzykany damytýǵa múmkindikteri bar dep oılaımyn», - dedi ol.

Erbolat Dosaev Mádenıet jáne sport mınıstrligimen birlese otyryp, «Azııa daýysy» jáne basqa da mýzykalyq festıvalderdi jańǵyrtý josparda bar ekenin atap ótti.

«Máslıhat qoldaǵan Almaty qalasyn damytý baǵdarlamasynda aýqymdy josparlar bar. Jyl saıyn adamdar bizge kelýi úshin kem degende 30 turaqty is-sharany josparlap otyrmyz. Mádenıet jáne sport mınıstrligimen birlese otyryp, «Azııa daýysy» jáne basqa da tarıhı qalyptasqan mýzykalyq festıvaldar men is-sharalardy jańǵyrtý kózdelgen. Dımash Qudaıbergenniń kontsertine keler bolsaq, bul – Ortalyq stadıonda sońǵy 25 jylda alǵash ret jasalǵan eksperıment. Óte jaqsy ótti. «Medeýdegi» festıvaldy qaıtarǵymyz keledi. Usynysyńyzǵa rahmet», - dedi shahar basshysy.