Azııa daýysy: Almatyda aty ańyzǵa aınalǵan Black Eyed Peas toby óner kórsetti

ALMATY. QazAqparat – 19 jylǵa sozylǵan úzilisten keıin Medeý muz aıdynynda bastalǵan «Azııa daýysy» halyqaralyq mýzyka festıvaliniń ekinshi kúni de emotsııaǵa toly boldy. 29 shildede sharanyń basty hedlaıneri – Black Eyed Peas tobynyń mega-juldyzdary kórermen aldynda óner kórsetti, dep habarlaıdy QazAqparat tilshisi.

Festıval tarıhynda alǵash ret shaqyrylǵan álem juldyzdarynyń tolyqqandy jeke kontserti ótti.

Zakazbiletov.kz jobasynyń dırektory Sábıt Súleımenovtyń aıtýynsha, Black Eyed Peas toby qazir Eýropadaǵy gastrolde júr. Eger olar Amerıkada bolǵanda alyp kelý qıynǵa soǵar edi. «Azııa daýysy» ótetin ýaqytta olar bos bolǵan.

«Olardy Almatyǵa Vengrııadan alyp keldik. Budan ári Ispanııaǵa ushyp ketedi, ıaǵnı eýropalyq týrlaryna qaıta oralady. Tańdaý nelikten olarǵa tústi? Sebebi basqalaryna qaraǵanda olar osynda kelgisi keldi jáne top mendjmenti Almatyǵa sapardy talqylaýǵa daıyn boldy. Kontsertti «Azııa daýysy» sheńberinde ótkizý sheshildi. Sebebi oǵan festıvaldiń formaty múmkindik berip turdy: birinshi kún – qazaqstandyq, ekinshi – halyqaralyq jáne úshinshi kún ańyz ánshilerge arnalǵan. Osylaısha, sáti bolyp, halyqaralyq kúndi toptyń álemdik týrnesimen biriktirý múmkin boldy», - deıdi S.Súleımenov.

Uıymdastyrýshylardyń sózinshe, qazirgi ýaqytta Black Eyed Peas toby «Where is the Love?» hıtiniń 20 jyldyǵy jáne osy attas toǵyzynshy albomnyń shyǵýyna oraı Elevation álemdik týrnesin ótkizýde. Mýzyka ańyzyna aınalǵan will.i.am osy úshin topqa qaıta qosylǵan. Al ánshi Fergıdiń ornyn J. Rey Soul sátti almastyryp ketken.

Black Eyed Peas – adamzat tarıhynda albomy eń kóp satylǵan toptardyń biri. Aty ańyzǵa aınalǵan amerıkalyq hıp-hop toby.

Keshegi kontsertte kishigirim oqıǵa boldy – Daǵystannan kelgen toptyń jankúıeri «I Gotta Feeling-di oryndaǵym keledi» degen jazýy bar plakat ustap turdy. Ony kórgen mýzykanttar jigitti sahnaǵa shaqyryp alyp, onymen birge ánniń bir bóligin oryndady. Daǵystandyq qonaqtyń qýanyshynda shek bolmady. Stadıonǵa jınalǵandar baqytty adam men will.i.am-ǵa qoshemet kórsetip, qol soqty.

«Qazirdiń ózinde jandanǵan «Azııa daýysy» týrızmniń damýyna áser ete bastady. Sebebi Qazaqstannyń ár qalalarynan jáne Reseı, Birikken Arab Ámirlikteri sııaqty birneshe elden jankúıerler Almatyǵa tek Black Eyed Peas úshin keldi. Almaty buryn-sońdy mundaı keremet shoýdy kórgen emes: Black Eyed Peas 2000-shy jyldardaǵy hıtterin oryndaǵan kezde kórermender túgel bıledi»,- dep atap ótti uıymdastyrýshylar.

Festıvaldiń ekinshi kúni áserli aıaqtaldy. «Hareket» qoǵamdyq qory «Azııa daýysy» sahnasynda qazaqstandyqtardyń aqshasyna satyp alynǵan páterdiń kiltin muqtaj otbasyna tabys etti.

Búgin, festıvaldiń sońǵy kúni kórermender ańyzǵa aınalǵan retro juldyzdardy kóredi. Secret Service jáne ıALLA toptary, qazaqstandyq estrada juldyzdary 40 mınýt óner kórsetedi jáne saltanatty otshashý bolady.

Festıvaldiń birinshi kúninde «Jas qanat 2023» jas oryndaýshylar baıqaýynyń jeńimpazdary óner kórsetken bolatyn. Sondaı-aq Baıǵalı Serkebaevtyń «Djýlııa» mıýzıklinen úzindiniń tusaýkeseri kezinde «A-studio» tobynyń ánderi shyrqalyp, kórermen álemdik hıtterdi eske aldy.

Aıta keteıik, Almaty qalasynyń ákimdigi kórermenderdiń «Medeýge» esh qıyndyqsyz jetip, qalaǵa oralýyn qamtamasyz etti. Festıval kúnderi qosymsha tegin avtobýstar qatynaıdy. Olar Sátbaev pen Baıtursynov qıylysynan saǵat 14:00-den 24:00-ge deıin 10-15 mınýt aralyqpen júredi.