Azııa Damý bankimen jasalǵan kelisim: qaryz qaı salaǵa jumsalady
ASTANA. KAZINFORM — Búgin Quryltaıdyń jalpy otyrysynda «Qazaqstan men Azııa Damý banki arasyndaǵy Qaryz týraly kelisimdi ratıfıkatsııalaý týraly» Zań eki oqylymda qaralyp, qabyldandy. Kelisim aıasynda ADB-dan 3,4 mlrd qytaı ıýani (227,4 mlrd teńge) kóleminde qaryz tartý kózdelgen.
Qaryzdy óteý merzimi — 15 jyl, onyń ishinde alǵashqy úsh jyl jeńildik kezeńi bolyp sanalady. Qaryz qarajaty eń aldymen áleýmettik sala, kólik ınfraqurylymy, ónerkásip, bilim berý jáne basqa da basym baǵyttardaǵy shyǵyndardy qarjylandyrýǵa jumsalady.
— Memleket basshysynyń osy jylǵy 13 tamyzdaǵy Jarlyǵyna sáıkes, 3,4 mlrd qytaı ıýaninde Qaryz týraly kelisimge 2026 jyly 11 qyrkúıekte qol qoıyldy. Bul qarajat, Úkimettiń birinshi kezektegi sharalaryn qoldaýǵa, kólik ınfraqurylymyn, ónerkásip, bilim berý jáne basqa da basym baǵyttardy qarjylandyrýǵa múmkindik beredi. Atalǵan banktiń qaryzy Qazaqstan Respýblıkasyna 3 jyldyq jeńildik kezeńin qosa alǵanda 15 jyl óteý merzimine beriledi. Syıaqynyń jalpy paıyzdyq mólsherlemesi — jyldyq 1,69%, — dedi Qarjy mınıstri Mádı Takıev.
Tartylatyn qarjyǵa qyzmet kórsetý jáne ony óteý Qaryz týraly kelisimde belgilengen qarjylyq sharttarǵa sáıkes, respýblıkalyq bıýdjet qarajaty esebinen júzege asyrylady.
Qazaqstan Azııa Damý bankine 1994 jyly qosylǵan. Memleketimizdiń úlesi 0,805 paıyz. Jalpy tartylǵan ınvestıtsııalar shamamen 8,7 mlrd AQSh dollarǵa jetti.
— Bul bank memleketimizdiń strategııalyq seriktestigi ekendigin jáne Qazaqstan ekonomıkasynyń damýyna eleýli úles qosatynyn atap ótý qajet. Ótken jyldar ishinde, Qazaqstan men Azııa Damý banki arasynda ekonomıkalyq máselelerdiń keń aýqymyn qamtıtyn berik jáne syndarly yntymaqtastyq qalyptasty. Banktiń belsendi qatysýymen, birqatar joba iske asyrylyp jatyr, eldiń serpindi áleýmettik-ekonomıkalyq damýyna baǵyttalǵan tehnıkalyq kómek pen granttar óteýsiz negizde berilip jatyr. Halyqaralyq deńgeıde Qazaqstanǵa tıisti qarajattyń berilýi elimizge degen joǵary senimdi bildiredi, — dedi Qarjy mınıstri.
Onyń sózine qaraǵanda, elimizdiń qarjylyq ornyqtylyǵy jetekshi reıtıngtik agenttikter bergen joǵary kredıttik reıtıngtermen rastalyp otyr.
— Іri halyqaralyq qarjy uıymdarynyń sarapshylary, memlekettik boryshtyń deńgeıin qalypty dep baǵalap, onyń basqarylatynyn jáne uzaq merzimdi ekonomıkalyq ósimdi qamtamasyz etýge múmkindik beretinin atap ótip otyr. Jalpy alǵanda, halyqaralyq qarjy uıymdarynan, onyń ishinde Azııa Damý banki sııaqty uıymdardan jeńildetilgen qaryz tartý — ekonomıkalyq ósýdi qoldaý jónindegi sharalardy qarjylandyrý qajet bolǵan kezde standartty tájirıbe, — dedi vedomstvo basshysy.
Buǵan deıin qyrkúıek aıynda Quryltaı «Qazaqstan Úkimeti men Azııa Infraqurylymdyq Investıtsııalar banki (AIIB) arasyndaǵy áriptestik týraly negizdemelik kelisimdi ratıfıkatsııalaý týraly» Zańy qabyldanǵanyn jazǵan edik.
