Azııa damý bankimen yntymaqtastyq nyǵaıa túsedi - Serik Jumanǵarın
ASTANA. KAZINFORM – Qazaqstan halyqaralyq qarjy ınstıtýttarymen yntymaqtastyqtyń berik júıesin qalyptastyrdy. Bul týraly Memlekettik aktıvterdi basqarý kompanııalarynyń halyqaralyq forýmynyń (IPAF) 10-shy sammıtinde Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
- Olardyń qataryna ekonomıkanyń túrli salalaryn damytýǵa júıeli serpin berýge qaýqarly Eýropalyq qaıta qurý jáne damý banki men Dúnıejúzilik bank toby kiredi. IPAF-tyń ınstıtýtsıonaldyq teń quryltaıshysy ári negizgi seriktesi sanalatyn Azııa damý bankiniń orny erekshe. 30 jyldan astam ýaqytqa sozylǵan tabysty yntymaqtastyq barysynda Azııa damý banki Qazaqstanda jalpy quny 7,5 mlrd AQSh dollarynan asatyn kóptegen jobany júzege asyrdy, - dedi Serik Jumanǵarın.
Osy oraıda Premer-mınıstrdiń orynbasary ADB-men seriktestik nyǵaıa beretinin atap ótti.
- 2029 jylǵa deıingi yntymaqtastyqtyń strategııalyq baǵyttary men Bilim jáne tájirıbe almasý baǵdarlamasy bekitildi, - dedi S. Jumanǵarın.
Aıta keteıik, bul jıynǵa 19 elden 200-ge jýyq ókil jáne 60-qa jýyq uıym qatysyp jatyr. IPAF – Azııa óńirindegi problemalyq aktıvterdi basqarý salasyndaǵy memlekettik uıymdardy biriktiretin jetekshi halyqaralyq alań. Sammıttiń Qazaqstanda ótkizilýi elimizdiń qarjy sektoryn saýyqtyrý jáne strestik aktıvterdi tıimdi basqarý baǵytyndaǵy tájirıbesin halyqaralyq deńgeıde tanytýǵa múmkindik beredi.
Buǵan deıin habarlanǵandaı, búginde memleketke zańsyz shyǵarylǵan 1,3 trıllıon teńge kólemindegi aktıvter qaıtaryldy.
