Azııa Damý Bankinen «Batys Eýropa-Batys Qytaı» dálizine 112 mln. dollar qaryz alynady - zań jobasy
ASTANA. 13 qazan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (jaı operatsııalar, (OAÓEY 1 kólik dálizi, Jambyl oblysyndaǵy jol ýchaskesi, (Batys Eýropa-Batys Qytaı halyqaralyq tranzıttik dálizi) Investıtsııalyq baǵdarlama - 4 joba) ratıfıkatsııalaý týraly» zań jobasyn maquldady.
Endi qujat Parlament Senatyna jiberiledi.
Atalǵan kelisimge 2011 jylǵy 7 maýsymda Astana qalasynda qol qoıylǵan. Kelisimniń maqsaty eldiń kólik áleýetiniń damýyn qamtamasyz etý úshin qaryz tartý bolyp tabylady. Bul shara óz kezeginde halyqaralyq tranzıttiń qazaqstandyq dáliz bóliginde jol qozǵalysynyń qarqynyn edáýir arttyryp, el bıýdjetiniń barlyq deńgeıiniń kiris bóligin ulǵaıtýǵa múmkindik beredi.
Osy rette kelisimge sáıkes, Azııa Damý Banki qarapaıym kapıtaldaǵy resýrstarynan Qazaqstan Respýblıkasyna 112 mln. AQSh dollary somasynda qaryz beredi. Qaryzdy óteýdiń merzimi 4 jyldyq jeńildikti qosa alǵanda 20 jyl. Paıyzdyq stavkasy paıyzdy esepteýdiń árbir kezeńine shaqqanda 0,3 paıyzǵa teń. Mindetteme úshin komıssııa 0,15 paıyzdy quraıdy.
Sonymen qatar, Qazaqstan Úkimetiniń birlesip qarjylandyrýy 18,76 mln. dollardan aspaıdy. Al respýblıkalyq bıýdjet qarajaty qurylys jumystaryn, sondaı-aq salyq tóleýdi birlesip qarjylandyrýǵa jumsalatyn bolady.
Kelisim sheńberinde jobanyń birqatar quramdas bólikterin de qosa júzege asyrý kózdeledi. Atap aıtqanda joldyń Jambyl oblysynyń aýmaǵy arqyly ótetin dáliziniń ýchaskesin Aspara kentinen bastap Blagoveşanka kentine deıin uzyndyǵy 40 shaqyrym bolatyn Taraz-Qordaı joly ýchaskesi boıynsha qaıta jańartý qarastyrylady.
