Azııa damý banki men Japonııanyń halyqaraly yntymaqtastyq agenttiginiń qarjysy halyqaralyq dálizdiń Jambyl oblysyndaǵy ýchaskelerin qaıta salýǵa jumsalady
ASTANA. 28 qarasha. QazAqparat - Taıaýda Astana qalasynda ótken avtomobıl joldary komıtetiniń otyrysynda «Batys Eýropa - Batys Qytaı» dáliziniń Jambyl oblysyndaǵy ýchaskelerindegi qurylys jumys barysy talqylandy.
Otyrysqa avtomobıl joldar komıteti, Jambyl oblystyq departamenti, merdigerlik uıymdar men qurylysty baqylaý jónindegi kompanııa basshylary qatysty.
Bul týraly QR Kólik jáne kommýnıkatsııa mınıstrliginiń baspasóz qyzmeti habarlaıdy.
Jambyl oblystyq departamentiniń dırektory Ulan Álipov óz baıandamasynda aýmaq boıynsha merdigerler jumys kestesi boıynsha, al keıbir merdigerler odan ozyńqy júrgizip otyrǵanyn atap ótti.
Jambyl oblysynda qurylys jumystary uzaqtyǵy 236 km ýchaskelerde júrgizilýde. Qalǵan 217 km Azııa Damý banki (ADB) men Japon halyqaralyq yntymaqtastyq agenttikten (JHYA) zaım alynýyna baılanysty.
Búgingi kúnge Qazaqstan Respýblıkasy men ADB arasyndaǵy úshinshi transh arqyly 173 mln. AQSh dollary somasyna zaım alý jónindegi Kelisim múddeli organdarmen maquldanyp, QR Úkimetiniń qaraýyna engizildi. Kelesi aıda oǵan qol qoıylady dep kútilýde. Sonymen qatar, merdigerlik kompanııalardy tańdaý jónindegi konkýrstyq rásimderi ótkizilýde. Jalpy uzaqtyǵy 97,7 km (162-260 km, Qyrǵyzstan shekarasyna kirme jol) ýchaskelerdegi qurylys kelesi jyldyń birinshi toqsanynda bastalýy tıis.
Qazaqstan Respýblıkasy men JHYA arasyndaǵy 6 mlrd. ıen somasyndaǵy zaım jónindegi Kelisimge qol qoıylyp qoıǵan. Qazirgi tańda bul Kelisim ratıfıkatsııalaý rásimin ótýde. JHYA qarjysy uzaqtyǵy 20 km (383-404 km) ýchaskesindegi jumystardy qarjylandyrýǵa jumsalady.
Jalpy, qazir oblys boıynsha 6 merdigerlik jáne 54 enshiles merdigerlik kompanııalar jumys atqarýda. 1504 tehnıka, 8 tsement-beton zaýyty jáne 3 jańa beton tósegish jumyldyrylǵan. Basqa salalardy qosa eseptegende, jumysqa barlyǵy 9812 adam tartylǵan.
22 qarashaǵa deıin 50 km-den astam tsement-beton jamylǵysy tóselip, jyl aıaǵyna deıin taǵy 7 km tóseý josparlanǵan.
«Aqmola qurylys materıaldary» kompanııasy 17 km asfaltbeton jamylǵysyn tósep, joldyń tómengi qabaty boıynsha qozǵalys ashyldy. Solarmen qatar, «K-dorstroı» kompanııasy da júktelgen mindetterdi jumys kestesinnen oza oryndaýda. Inerttik materıaldardyń ýaqytyly jetkizilmegendikten «KSS/Jambyljolqurylys» ı «Kazahdorstroı» kompanııalary artta qalyp keldi. Osyǵan baılanysty, olarǵa bul máseleni baqylaýǵa alyp, materıaldardy jetkizý kestesin ázirleý tapsyryldy.
Otyrysty qorytyndylaı kele, avtomobıl joldary komıtetiniń tóraǵasy Zamır Saǵynov josparlanǵan qurylys jumystaryn aýa raıyna qaraı qysqa merzimde aıaqtaý qajettigin atap ótti. Sondaı-aq, 2011 jyldyń qurylys naýqanyna jol-qurylys materıaldaryn ázirleýge erekshe nazar aýdarýdy tapsyrdy. Osyǵan oraı, barlyq merdigerlik uıymdarǵa qysqy merzimde qajet bolatyn temir jol vagondarynyń sanyn anyqtap, materıaldardy ázirleý kestesin jasaý jóninde tapsyrma berildi.
