Azııa Damý banki Qazaqstanǵa qaryz beredi
ASTANA. 21 qańtar. QazAqparat - Búgin QR Parlament Senaty Ekonomıkalyq damý jáne kásipkerlik komıtetinde «Qazaqstan Respýblıkasy men Azııa Damý banki arasyndaǵy Qaryz týraly kelisimdi (Jaı operatsııalar) («Batys Eýropa - Batys Qytaı» halyqaralyq tranzıt dálizi) ratıfıkatsııalaý týraly» zań jobasy talqylandy.
Ýchaskeniń jalpy uzaqtyǵy - 65 shaqyrym, onyń 7,7 shaqyrymy tsement-betondy jamylǵysy bar birinshi tehnıkalyq kategorııaly, al 57,4 shaqyrymy asfalt-betondy jamylǵysy bar ekinshi tehnıkalyq kategorııaly bolady. Aınalma jol kóptegen eldi mekender, jaıylym men omartalar ornalasqan qalamańy aýmaǵy arqyly ótetin bolǵandyqtan, qurylys jobasynda 11 kópir men jol ótpelerin, 155 sý ótpe qubyrlaryn, sondaı-aq mal ótpelerin salý josparlanǵan. Atalǵan jasandy qurylystar tranzıt kóligine kedergisiz ótýge jáne osy ýchaskede qozǵalys qaýipsizdigin qamtamasyz etýge múmkindik beredi. Sóıtip, joldyń qazirgi bóligin 7,7 shaqyrymǵa jańǵyrtý, sondaı-aq Taraz qalasyn 57,4 shaqyrymǵa aınalma jol qurylysyn salý qarastyrylyp otyr.
Bul zań jobasyn iske asyrý elimizdiń tasymal áleýetin arttyrýǵa yqpal etip, halyqaralyq dálizdiń qazaqstandyq bóligindegi qozǵalystyń jıiligin ulǵaıtady.
Kelisimge sáıkes, Azııa Damý banki Qazaqstan Respýblıkasyna 95 mıllıon AQSh dollary somasynda zaım beredi. Ony tórt jylǵy jeńildik ýaqytyn qosqanda, qaıtarý ýaqyty 20 jyl. Mindettemege komıssııa jylyna 0,15 paıyz mólsherlemesi boıynsha alynady. Qazaqstan Respýblıkasy Úkimetiniń qosymsha qarjylandyrýy 17 mıllıon dollardan aspaıdy. Respýblıkalyq bıýdjettiń qarjysy qurylys jumystaryn, sondaı-aq salyqty tóleýge jiberiletin bolady.
