Azııa Damý Banki Qazaqstanǵa 95 mln. dollar qaryz beredi
ASTANA. 9 qańtar. QazAqparat - Búgin QR Parlamenti Májilisiniń jalpy otyrysynda palata depýtattary
«Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operatsııalar) (OAÓEY-1 kólik dálizi) (Taraz qalasynyń aınalma joly) (Batys Eýropa - Batys Qytaı halyqaralyq tranzıt dálizi) ratıfıkatsııalaý týraly» zań jobasyn maquldady. Atalǵan zań jobasy halyqaralyq Bankten qarjy tarta otyryp, Batys Eýropa-Batys Qytaı halyqaralyq dálizi men Taraz qalasynyń aınalma jolyn salýǵa qarjy tartýdy kózdeıdi. Qujat Senattyń talqysyna joldanady.
Toqtala ketetin jaıt, Batys Eýropa-Batys Qytaı dáliziniń iske asýy elimizdiń kólik áleýetin damytýdy qamtamasyz etip, halyqaralyq baǵyttyń qazaqstandyq bóligi boıynsha qozǵalys qarqynyn edáýir arttyrady jáne tıisinshe tranzıttik júkterdiń aınalymyn ósiretin bolady.
Al Qazaqstan men Azııa Damý Banki arasyndaǵy Qaryz týraly kelisim sheńberinde eki jolaqty qozǵalysty ekinshi tehnıkalyq sanattaǵy, qashyqtyǵy 7,7 shaqyrym joldyń qoldanystaǵy ýchaskesin tsement-beton tóselgen jáne tórt jolaqty qozǵalystaǵy sanatqa aýystyra otyryp, jańǵyrtý qarastyrylady. Bunymen qosa, Taraz qalasynyń qashyqtyǵy 57,4 shaqyrym jańa aınalma ýchaskesiniń qurylysyn salý kózdelgen. Kólik jáne kommýnıkatsııa vıtse-mınıstri Roman Sklıardyń aıtýynsha, kelisimge sáıkes Bank Qazaqstanǵa 95 mln. AQSh dollary somasynda qaryz usynady. Bul rette 4 jyldyq jeńildikti qosa alǵanda qaryzdy óteý merzimi 20 jylǵa teń. Qaryz jylyna 0,15 paıyz mólsherlememen beriledi. Al Qazaqstan Úkimetiniń atalǵan jobany qarjylandyrý úlesi 17 mln. dollardan aspaıdy. Bul rette bıýdjet qarajaty qurylys jumystaryn qosymsha qarjylandyrýǵa, sondaı-aq salyqtardy tóleýge baǵyttalady.
