Azııa Damý Banki Qazaqstanǵa 125 mln. dollar qaryz beredi
ASTANA. 18 qyrkúıek. QazAqparat - Búgin Parlament Májilisiniń jalpy otyrysynda palata depýtattary «Batys Eýropa - Batys Qytaı» tranzıttik dálizine qatysty Qazaqstan men Azııa Damý Banki arasyndaǵy Qaryz týraly Kelisimdi ratıfıkatsııalaý týraly zań jobasyn óndiriske aldy.
«Kelisim Azııa damý bankiniń qazaqstanǵa «Batys Eýropa-Batys Qytaı» dálizi sheńberinde Shymkent-Tashkent ýchaskesin damytý úshin qaryz berýdi kózdeıdi. Kelisimge sáıkes, 125 mln. dollar somasyndaǵy qaryz Qazaqstanǵa 16 jylǵa berilip otyr», - deıdi zań jobasy boıynsha túsinik bergen halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev.
Jalpy, Azııa Damý Banki qaryzy «Shymkent - Tashkent» joly sheńberinde 705 shaqyrym jáne 742 shaqyrym arasyndaǵy uzyndyǵy 36,7 shaqyrym jol ýchaskesin qaıta jóndeýge jumsalady. Jobany júzege asyrý elimizdiń kóliktik áleýetin damytýdy qamtamasyz etip, halyqaralyq dálizdiń qazaqstandyq bóligi boıynsha qozǵalys qarqynyn aıtarlyqtaı arttyrady.
Bul óz kezeginde tranzıttik júkterdiń júk aınalymyn ulǵaıtýǵa yqpal etedi jáne barlyq deńgeıdegi bıýdjetterdiń kiristerin ulǵaıtýǵa múmkindik beredi.
