Azııa damý banki Qazaqstandaǵy apat qaýpi bar úılerdi saqtandyrýǵa qaryz bólýi múmkin

ASTANA. KAZINFORM – Úkimet tabıǵı apat qaýpi joǵary eldi mekenderdiń kartasyn ázirlep, ondaǵy turǵyndardy ıeligindegi baspanany saqtandyrýǵa mindettemekshi. Bul týraly Premer-mınıstr Oljas Bektenovtiń Májilis depýtattarynyń saýalyna joldaǵan jaýabynda aıtylǵan.

- Birikken Ulttar Uıymynyń baǵalaýy boıynsha, Qazaqstan aýmaǵynyń 75%-y túrli tabıǵı apattar aldynda osal. Biraq turǵyn úı ǵımarattarynyń tabıǵı apattardan saqtandyrylý deńgeıi óte tómen kúıde qalyp otyr. Respýblıka boıynsha turǵyn úı ǵımarattarynyń 3,2%-y ǵana, Almaty qalasynda 7,7%-y ǵana saqtandyrylǵan, - dep jazylǵan jaýapta.

Oljas Bektenovtiń málimetinshe, byltyrǵy tasqyn qaýipti aımaqtardaǵy nysandardyń basym bóligi saqtandyrylmaǵanyn kórsetip ketken.

- Bul oraıda saqtandyrylǵan nysandarǵa saqtandyrý uıymdary 709,6 mln ótemaqy tóledi. Taǵy 132,9 mln teńge tólený kerek. Byltyr Qarjy naryǵyn retteý jáne damytý agenttigi múddeli memlekettik organdarmen birge jáne halyqaralyq sarapshylarmen birlesip tabıǵı apattardy memleket-jeke menshik áriptestigi aıasynda basqarýdyń keshendi júıesin qurýǵa baǵyttalǵan usynystar ázirledi. Bul júıeniń bıýdjetke artatyn salmaǵyn azaıtý úshin Azııa Damý banki apat qaýpi joǵary óńirlerde (2 qala men 13 oblysta) baspanany saqtandyrýdy mindetti etýdi usyndy. Bıýdjet qarajaty men syrtqy qaryzdar esebinen saqtandyrý júıesi halyqty apattardan qorǵaýǵa múmkindik beredi. Qazirgi tańda Úkimet Qarjy naryǵyn retteý jáne damytý agenttigimen birge zańnamaǵa baspanany tabıǵı apattan mindetti saqtandyrý baǵytynda túzetý ázirlep jatyr. Sonymen bir mezette tabıǵı apattar aldynda osal óńirlerdiń kartasy jasalyp, azamattardyń turǵyn úı múlki túgendelip, jyljymaıtyn múlikter bazasy jańartylyp jatyr, - dep jazady Premer-mınıstr.

Buǵan deıin Kazinform elimizde jyljymaıtyn múlikti saqtandyrý quny qansha turatynyna sholý jasaǵan edi.