Azııa damý banki Qazaqstan jobalaryna 5,5 mlrd dollar ınvestıtsııa salady
ASTANA. KAZINFORM –
Qazaqstan Energetıka mınıstri Erlan Aqkenjenov Astanada ótken Óńirlik ekologııalyq sammıt aıasynda Azııa damý bankiniń bas dırektory Evgenıı Jýkovpen ekijaqty kezdesý ótkizdi.
Kezdesý barysynda taraptar energetıka salasyndaǵy yntymaqtastyqtyń aǵymdaǵy jaı-kúıi men perspektıvalaryn talqylady. Mınıstr banktiń Qazaqstannyń energetıkalyq ınfraqurylymyn jańǵyrtýǵa, ozyq tehnologııalardy engizýge jáne turaqty sheshimderdi damytýǵa qosqan eleýli úlesin atap ótti.
Qazaqstan Úkimeti men Azııa damý banki basshylyǵy arasyndaǵy kelissózderdiń qorytyndylaryna erekshe nazar aýdaryldy. Olardyń nátıjesinde 2026–2029 jyldary jalpy somasy shamamen 5,5 mlrd AQSh dollary bolatyn 15 jobany iske asyrýdy kózdeıtin memorandýmǵa qol qoıyldy.
Yntymaqtastyqtyń negizgi baǵyttarynyń biri retinde jylýmen jabdyqtaý júıelerin jańǵyrtý aıqyndaldy. Osy turǵyda 2024 jyly qabyldanǵan «Jylý energetıkasy týraly» zańnyń mańyzdylyǵy ataldy, ol salany damytý úshin zamanaýı normatıvtik negiz qalyptastyrdy.
Taraptar sondaı-aq óńirlerdiń jylýmen jabdyqtaý shemalaryn ázirleý boıynsha birlesken jumysty talqylady. Bul sharalar energııa tıimdiligin arttyrýǵa, shyǵyndardy azaıtýǵa jáne JEO, qazandyqtar men jylý jelilerin jańǵyrtýǵa baǵyttalǵan.
Dekarbonızatsııa jáne zamanaýı tehnologııalardy engizý máselelerine de erekshe nazar aýdaryldy. Atap aıtqanda, gaz sheshimderi, jylý energııasyn jınaqtaý júıeleri jáne jelilerdi tsıfrlyq basqarý baǵyttary qarastyryldy.
Sonymen qatar elektr jelilerin damytý, Smart Grid sheshimderin engizý jáne jańartylatyn energııa kózderiniń úlesi artqan jaǵdaıda energojúıeniń turaqtylyǵyn qamtamasyz etý úshin energııa jınaqtaý júıelerin damytý perspektıvalary talqylandy.
Taraptar ınfraqurylymdyq jobalardy qarjylandyrýdy keńeıtýge, jeke ınvestıtsııalardy tartýǵa, tarıftik saıasatty jetildirýge, memlekettik-jekeshelik áriptestik tetikterin damytýǵa jáne kadrlar daıarlaýǵa qatysty yntymaqtastyqty odan ári damytýǵa múddelilik bildirdi.
Kezdesý qorytyndysy boıynsha qos tarap strategııalyq áriptestikti odan ári nyǵaıtýǵa senim bildirdi.
Aıta keteıik, Bozymbaev Azııa damý bankimen sý jáne energetıka salasyndaǵy jobalardy pysyqtady.
