Azııa chempıony Bek Nurmaǵanbet álem birinshiligine qatyspaıtyn boldy
NUR-SULTAN. QazAqparat - Bokstan Qazaqstan quramasynyń bas bapkeri Ǵalymbek Kenjebaev Ekaterınbýrgtegi álem chempıonatyna qatysatyn sportshylar tizimin jarııalady, dep habarlady Olympic.kz.
Olardyń qatarynda 81 kelidegi Azııa chempıony Bek Nurmaǵambet pen 75 kelidegi álem chempıonatynyń júldegeri Ábilhan Amanqul joq. Bas bapker atalǵan boksshylardyń jaraqatynan tolyq aıyqpaǵanyn málimdedi.
«81 kelidegi Bek Nurmaǵanbet Azııa chempıonatyna jaraqatymen qatysqan bolatyn. Qurlyq birinshiliginen soń onyń aıaǵyna ota jasaldy. Sol sebepti, Bek áli tolyǵymen qalpyna kelgen joq. 75 kelidegi Ábilhan Amanqul Prezıdent kýbogy qarsańynda jaraqat aldy. Eki boksshy da quramanyń jattyǵý jıynyna qatysty. Biraq jaraqatyn asqyndyryp almaý úshin olarǵa kóp salmaq túsirmedik. Ekeýiniń qatarǵa qosylýyna áli biraz ýaqyt kerek. Al 81 kelide Qazaqstan atynan Bekzat Nurdáýletov baq synaıdy. Ol buryn 91 kelide judyryqtasqan jigit. Bıylǵy Prezıdent kýbogynyń fınalyna deıin jetti. 75 kelide Azııa chempıony Tursynbaı Qulahmetke úmit artamyz», - deıdi Ǵalymbek Kenjebaev.
