Azııa chempıony atanǵan qazaqstandyq boksshylar jarys týraly pikir bildirdi
Aıta ketsek, Taıland astanasy Bangkok qalasynda 16-26 qańtar aralyǵynda ótken qurlyqtyq dodada el quramasynan Sanjar Táshkenbaı (48 keli), Nursultan Altynbek (54 keli), Mahmýd Sabyrjan (57 keli) chempıon atandy.
Fınaldyq kezdesýinen keıin Sanjar Táshkenbaı: «Búgingi jekpe-jek oıdaǵydaı ótti. Jalpy, qurlyqtyq dodadaǵy barlyq qarsylasym ońaıǵa soqqan joq. Árbiriniń daıyndyqqa kóbirek kóńil bólgeni baıqalady. Dese de fınaldaǵy kezdesýde kóbirek ter tógýge týra keledi. Endi aldaǵy saıystarǵa daıyndyqty bastaımyz», - dedi.
Al Nursultan Altynbek sońǵy kezdesýi ońaıǵa soqpaǵanyn atap ótti. Aldaǵy jarystarǵa daıyndyq barysy jóninde oıyn bildirdi.
«Qoldaý kórsetken qazaqstandyq barlyq jankúıerlerge alǵysymdy bildiremin. Jekpe-jek barysynda sáttilik serik boldy. Fınaldaǵy jekpe-jekte ózime sendim. Fılıppındik qarsylasymnyń osal emes ekenin bilemin. Osylaısha alǵa qoıǵan maqsatymdy oryndadym. Azııa chempıonaty óte joǵary deńgeıde boldy. Mol tájirıbe jınaqtadym. Aldaǵy Ózbekstanda ótetin álem chempıonatyna daıyndyqty bastaımyz», - dedi ol.
Taǵy bir chempıon Mahmýd Sabyrhan: «Fınaldaǵy qarsylasym taılandtyq boksshy boldy. Árıne, negizgi maqsatym - ony aıqyn basymdyqpen jeńý edi. Úsh raýndta da qarsylastan joǵary deńgeıde oıyn kórsete aldym. Eń qıyn jekpe-jegim - fınaldaǵy kezdesý. Oǵan deıin Ózbekstan, Malaızııa, Fılıppın boksshylarynan basym tústim. Fınaldaǵy taılandtyq qarsylasym qıyn tıdi», - dedi.
Eske salsaq, elimizdiń erler quramasynda barlyǵy 13 boksshy synǵa tústi. Qurama sapyndaǵy sportshylar 11 medalǵa qol jetkizdi. Onyń ishinde 3-eýi – altyn, 3-eýi – kúmis, 5-eýi – qola. Nátıjesinde, medaldar kestesinde ekinshi oryn aldy.
Foto: Getty Images
