Azııa chempıony atanǵan elordalyq palýan elge oraldy
ASTANA. KAZINFORM — Vetnamnyń Danang qalasynda kúres túrlerinen jastar arasynda ótken Azııa chempıonatynda elordalyq sportshy Aıbek Aıtbekov grek-rım kúresinen altyn medal jeńip, elimizdiń abyroıyn asqaqtatty, dep habarlaıdy elorda ákimdiginiń resmı saıty.
Jeńimpazdy elge oralǵan sátte qalalyq sport mekemeleriniń basshylary men ujymy, ata-anasy, bapkerleri jáne kúres túrleri federatsııasynyń ókilderi saltanatty túrde qarsy aldy.
Kezdesý barysynda chempıonǵa ystyq lebizder aıtylyp, aldaǵy jarystarda da bıik belesterdi baǵyndyrýyna tilektes ekenderi bildirildi.
— Azııa chempıonaty óte joǵary deńgeıde ótti. Ózimiz josparlaǵan nátıjege qol jetkizdik dep oılaımyn. Bapkerlerimizben birge naqty maqsat qoıyp, soǵan saı daıyndaldyq. Aldaǵy josparym — bosańsymaı, U23 jastar arasyndaǵy álem chempıonatyna tyńǵylyqty daıyndalý. Budan bólek, aǵaılarymnyń aıtýymen aldaǵy jarystarǵa da daıyndyq jumysyn jalǵastyramyz, — dedi Azııa chempıony Aıbek Aıtbekov.
Aıbek Aıtbekov osyǵan deıin de halyqaralyq jáne respýblıkalyq jarystarda joǵary nátıjelerimen tanylyp keledi. Ol — Azııa chempıonatynyń kúmis jáne qola júldegeri, álem chempıonatynyń qola júldegeri, sondaı-aq grek-rım kúresinen Qazaqstan Respýblıkasynyń bes dúrkin chempıony.
Sonymen qatar, erkin kúresten elordalyq balýan Rızabek Aıtmuhan 125 keli salmaq dárejesinde altyn medal jeńip alyp, Qazaqstan quramasynyń qorjynyna kezekti altyn júldeni saldy.
Aıta keteıik, atalǵan Azııa chempıonatynda Qazaqstan quramasy jalpy esepte 7 altyn, 10 kúmis jáne 5 qola medal jeńip alyp, joǵary nátıje kórsetti.
Budan buryn Vetnamdaǵy Azııa chempıonatynda otandyq balýandar tórt medalǵa ıe bolǵanyn jazdyq.
