Azııa chempıondary: Jeńiske birneshe aılyq daıyndyqtyń arqasynda jettik
ASTANA. KAZINFORM — Brazılııalyq djıý-djıtsýdan Azııa chempıonatynda tarıhı nátıje kórsetken qazaqstandyq sportshylar jeńistiń ońaı kelmegenin aıtady. Bul týraly Azııa chempıondary Aqnur Ǵalym, Kemal Rýzahýnov jáne Álıma Jumadeldınova Jibek Joly telearnasynyń «Búgin LIVE» baǵdarlamasynda aıtty.
Olardyń sózinshe, birneshe aılyq tyńǵylyqty daıyndyq, komandanyń ózara qoldaýy jáne bapkerlerdiń eńbegi joǵary nátıje kórsetýge múmkindik bergen.
— Jalpy kúreste árdaıym tehnıka birinshi orynda bolady. Tehnıka men taktıka qatar júredi, al fızıkalyq kúsh tek kómekshi qural. Ádis-tásildi bilmeseń, tek kúshpen jeńý óte qıyn, — dedi Azııa chempıony Aqnur Ǵalym.
Onyń aıtýynsha, Qazaqstanda sońǵy eki-úsh jylda áıelder arasyndaǵy brazılııalyq djıý-djıtsý qarqyndy damyp keledi. Qazir elde Álem, Azııa jáne Eýropa chempıondary kóbeıgen.
Komandalyq qoldaý da sportshylardyń tabysyna aıtarlyqtaı áser etken.
— Komandasyz osyndaı jetistikke jetý qıyn bolar edi. Árqaısymyz jeke kúressek te, jeńsek birge qýandyq, jeńilsek bir-birimizge demeý boldyq, — dedi Aqnur Ǵalym.
Azııa chempıonatynyń qos dúrkin jeńimpazy atanǵan Kemal Rýzahýnov daıyndyq mamyr aıynan bastalǵanyn aıtty.
— Biz jarysqa uzaq daıyndaldyq. Týrnırge bir aı qalǵanda Brazılııadan tájirıbeli sportshy kelip, úsh apta boıy bizdi jattyqtyrdy. Sonyń nátıjesinde eki altyn medal jeńip aldyq, — dedi ol.
Sportshynyń aıtýynsha, eń aýyr beldesýlerdiń biri absolıýttik salmaqta ótken.
— Óz salmaǵymdaǵy jarysta jeńiske jetkennen keıin absolıýttik salmaqtaǵy altyn erekshe mańyzdy boldy. Onda tórt kezdesý ótkizdim jáne qarsylastarymnyń bári menen salmaǵy aýyr edi, — dedi Kemal Rýzahýnov.
Ol alǵashqy beldesýinde 118 keli tartatyn japonııalyq sportshyǵa qarsy shyqqanyn da eske aldy.
Sportshylar bapkerleriniń eńbegin erekshe atap ótti. Kemal Rýzahýnovtyń aıtýynsha, onyń jeke bapkeri ári ákesi Armanjan Rýzahýnov daıyndyqtyń ár kezeńinde janynan tabylǵan.
Eske sala keteıik, Qazaqstan quramasy bıyl alǵash ret brazılııalyq djıý-djıtsýdan Azııa chempıonatyna qatysyp, birneshe altyn, kúmis jáne qola medal jeńip aldy. Sportshylardyń aıtýynsha, endi olar Máskeýde ótetin halyqaralyq týrnırge, Abu Dhabi Grand Slam jarysyna jáne jyl sońyndaǵy álem chempıonatyna daıyndalady.
